Op 22 Junie, een jaar gelede, is inwoners van die dorp verslae gelaat nadat dit bekend geword het dat ’n vierjarige seuntjie in ’n huisbrand in Queenslaan oorlede is.

Die tragiese voorval het vele mense diep geraak. ’n Kerslig-nagwaak en die daaropvolgende begrafnis van klein Wanru Meyer is deur honderde mense bygewoon.

Wanru was saam met sy ouers, Armand (24) en Makayla (23), en sy jonger boetie Caleb (3), aan die slaap in die huis toe die brand uitgebreek het.

Vir sy hartseer ouers en nabye familie was die afgelope jaar ’n opdraande pad, en hulle klou vas aan die mooi herinneringe en magdom foto’s wat hulle van Wanru het.

Op 28 Maart vanjaar, toe hy sy vyfde verjaardag sou vier, het sy ouers en boetie teruggekeer na die huis waar hulle vir hom vyf kerse aangesteek het, asook blomme en ballonne geplaas het om hul seuntjie te onthou.

“Ons sal hom nooit vergeet nie. Die afgelope jaar was moeilik, maar veral nou dat dit presies ’n jaar is nadat hy oorlede is, herleef ’n mens dit meer intens,” het Makayla aan die Herald gesê.

Sy, Armand en Caleb het ook Maandagaand, presies ‘n jaar na die tragiese voorval, weer die huis besoek en kerse aangesteek ter nagetagtenis aan hul kind.

“Maandag was werklik ’n baie emosionele dag,” het Makayla gesê.

Sy vertel dat die gebeure ook ’n groot impak op Caleb gehad het.

“Wanneer ons verby die huis loop of ry, sal hy sê: ‘Boetie brand’. Hy huil dikwels en vra na sy boetie. Ek het baie foto’s van Wanru in die plek waar ons nou woon, en Caleb kyk gereeld daarna. Ek vertel vir hom dat sy boetie nog lief is vir hom en in sy hartjie bly.”

LEES OOK: Diewe steel elektriese kabels by Laerskool Brakpan-Oos terwyl kerkdiens aan die gang is

Wanru se ouma, Elsie Meyer, het gesê die gebeure van 22 Junie 2025 het hul lewens vir altyd verander.

“Die verwoestende verlies van Wanru het ’n leemte gelaat wat nooit gevul kan word nie. Geen dag gaan verby sonder gedagtes aan sy aansteeklike glimlag, sy lag, sy nuuskierigheid en die vreugde wat hy aan die mense om hom gebring het nie.

“In die dae, weke en maande ná die tragedie is ons oorweldig deur die medelye wat aan ons familie betoon is.

“Van nooddienspersoneel en mediese personeel tot bure, vriende, kollegas en volkome vreemdelinge; talle mense het uitgereik met vriendelikheid, gebede, bemoediging en finansiële ondersteuning,” het sy bygevoeg.

“Deur hierdie moeilike jaar is ons nederig gemaak deur die respek wat vir Wanru se nagedagtenis betoon is en deur die volgehoue ondersteuning wat aan sy familie gebied word.

“Die vriendelikheid wat ons ontvang het, was ’n bron van krag en het ons daaraan herinner dat selfs tydens diepe tragedie medemenslikheid en menslikheid voortleef,” het Elsie gesê.

“Vandag onthou ons Wanru nie net vir die manier waarop hy hierdie wêreld verlaat het nie, maar ook vir die manier waarop hy daarin geleef het.

“Hy was ’n geliefde seuntjie, ’n liefdevolle boetie, ’n gekoesterde kleinseun en ’n spesiale kind wat geluk aan soveel mense gebring het.

“Sy nagedagtenis leef steeds voort in ons harte en in ons gesprekke en in die talle lewens wat hy tydens sy vier kosbare jare aangeraak het,” het Elsie bygevoeg.

Volgens haar duur die amptelike ondersoek na die oorsaak en omstandighede rondom die brand steeds voort.