Meer as 100 vroue het Saterdag ’n Vrouedag by die Ou Apostoliese Kerk bygewoon, waar voorskote, vrolikheid en groot pryse vir ’n onvergeetlike dag gesorg het.

Vanjaar se tema was “Voorskoot”, en die vroue het behoorlik gewys dat ’n voorskoot veel meer kan wees as net iets wat jy aantrek wanneer jy in die kombuis staan.

Met 14 gasvroue en ’n indrukwekkende 96 gaste was daar behoorlik lewe in die vertrek. Daar is gekuier, gelag, stories uitgeruil en natuurlik ook ’n bietjie meegeding.

Die kompetisie was sterk en die pryse was groot, terwyl daar onder meer meegeding is vir die mooiste tafel, die mooiste voorskoot en die snaaksste voorskoot.

“Elke tafel en elke voorskoot het sy eie persoonlikheid gehad, en dit was duidelik dat die vroue hulself behoorlik geniet het,” het een van die organiseerders gesê.

Vir diegene wat tussen al die geselligheid ’n bietjie inkopies wou doen, was daar ook stalletjies waar heerlike lekkernye te koop was.

“Geen groot geleentheid gebeur vanself nie. Ons wil daarom graag ons opregte dank en waardering uitspreek teenoor al die borge wat pryse vir die dag geskenk en geborg het,” het die organiseerder gesê.

Daar word reeds met groot afwagting uitgesien na die 2027 Vrouedag.

ALSO CHECK: Springs Road potholes repaired, stormwater pipe inspected

ALSO CHECK: Minnebron sewage leak continues to pollute Witpoort wetland