Brakpan se tak van die Vroue-Landbou-unie (VLU) het op Dinsdag, 13 Oktober, vir hul maandelikse vergadering byeengekom. Die lede het na skoonheidskoningin Bianca Birnie geluister, wat hulle meer vertel het oor die tema vir die jaar: “Wees die verskil.”

Sy het die vroue gevra: “Wie se lewe gaan beter wees omdat jy daarin is? Gaan iemand meer hoop hê, meer glimlag, of net onthou dat daar ‘n vrou is wat bereid was om te luister?”

Volgens Birnie is dit maklik om ‘n verskil te maak. “Mense is dikwels vinnig om te kritiseer, en stadig om te verstaan. Ons vergeet soms om raak te sien hoeveel iemand deurgaan, maar jy hoef nie ryk, beroemd of belangrik te wees om liefde te gee nie,” sê sy.

Om te luister, te probeer verstaan, op ‘n klein manier te help kan, volgens Birnie, ‘n reuse verskil maak in iemand se lewe, en mens hoef nie self perfek te wees om iemand anders te kan help nie.

“Soms is ‘n glimlag net genoeg. My ma het altyd gesê ‘n glimlag kos niks. Dit kan dalk iemand se lewe verander. Soms is ‘n drukkie of die woorde ‘ek is hier vir jou’ genoeg,” sluit sy mee af.

Die tak berei voor vir ‘n verkiesing vir ‘n nuwe voorsitter, onder-voorsitter en tessourier waarvoor daar volgende maand gestem sal word, sowel as die laaste pannekoek-verkope by die Just Wheels se opedag wat op 25 Oktober plaasvind.

Die VLU is oop vir enige vroue om lede te word, en behels die verryking van vroue se kennis, wysheid en praktiese vaardighede. Dit verskaf ook vriendskap, doelwitte en liefdadigheid vir lede om na te streef.

Indien enigeen ‘n vergadering wil bywoon, of ‘n lid wil word, kan hulle die tweede Dinsdag van elke maand by die Just Wheels klubhuis ‘n draai maak, of takvoorsitter Delores van Rooyen by op 083 785 6104 kontak.