Hoërskool Fochville se o.14-rugbyspan het die seisoen afgesluit op ’n hoogtepunt deur tot in die semi-finaal van die Noordvaal Afdeling 3-kampioenskap te vorder.

Volgens die skool se woordvoerder, Elsabé de Mesquita, was dit van vroeg af duidelik dat hierdie groep seuns en hul afrigters, Mnr Hefer en Mnr Bloem, bestem was vir groot prestasies.

“Hulle groot harte, ywer en passie in elke oefening en wedstryd was ’n groot rede vir hul sukses hierdie seisoen,” sê sy.

Die span se uitstekende pad sluit in:

• Net een nederlaag in hul Super 16-poel, met die res oorwinnings met groot tellings.

• ’n Onoorwonne toer in Vrede, waar hulle drie wedstryde gewen het – selfs teen o.15-spanne.

• In die uitspele het hulle Hoërskool Bergvlam van Nelspruit 29–3 geklop.

• In die kwartfinaal het hulle met ’n reuse telling van 46–0 teen Hoërskool Sutherland gewen.

Hulle seisoen het tot ’n einde gekom in die semi-finaal teen Hoërskool Linden, wat later die algehele wenners was.

“Hierdie seuns se merkwaardige gedrag, op en van die veld, getuig van mooi dinge wat wag in 2026,” het De Mesquita afgesluit.