Bejaarde se ‘parkering’ laat koppe draai

‘n Bejaarde dame van Suikerbosoord Dienssentrum vir Bejaardes het vanoggend net na 08:00 ‘n ongeluk met haar voertuig in die tehuis se parkeerarea gehad.

Sy het volgens ooggetuies agteruit uit ‘n parkeerplek gery en klaarblyklik die brandstofpedaal te diep getrap (of per ongeluk die petrol- in plaas van die rempedaal getrap) toe die ongeluk gebeur het. Die motor het met die agterkant teen ‘n boomstomp opgery en teen die tehuis se heining tot stilstand gekom.

In die proses is ‘n lamppaal ook getref.

Die bejaarde het ongedeerd van die voorval afgekom, maar die insleepdiens reken die voertuig is afgeskryf.