Volgens die bestuurder van ‘n Toyota bakkie het hy die saagsels vroeër die dag in Secunda gekoop en was na sy hoenderonderneming in Heidelberg onderweg.

“Ek het in die truspieël gekyk en rook opgemerk. Ek het dadelik van die pad afgetrek om ondersoek in te stel, maar het skaars stilgehou toe die saagsels aan die brand slaan,” het hy aan HERAUT gesê.

Dit is nie duidelik hoe die saagsels aan die brand geslaan het nie, maar die moontlikheid dat dit deur ‘n sigaretstompie veroorsaak is, word nie uitgesluit nie.

Brandbestryders van Nigel Nooddienste het seker gemaak die smeulende saagsels hou geen gevaar vir ander motoriste op die Nigel/Heidelberg-pad in nie.