Moord op 21-jarige Heidelberger het gemeenskap op hul knieë
Abigail Meyer noodlotting gewond tydens kaping voor ouerhuis
HEIDELBERG – Die onsinnige moord van Abigail (21) – dogter van een van Heidelberg se bekendste paramedici – Elzona Meyer – het Heidelberg geruk sedert Vrydagaand toe die voorval plaasgevind het.
Die presiese gebeure tydens die voorval is nog duister en ‘n wye soektog na die kapers deur ‘n gedugte polisiespan duur voort.
“Ons sal nie rus voordat ons die skuldiges aangekeer het nie.”
Dit is die woorde van ‘n offisier in die SAPD wat sedert gisteraand onverpoosd werk om die aanvallers vas te trek.
Die voertuig wat gekaap was (‘n rooi Ford Fiesta) is gisteraand in KwaThema deur polisie gevind. Die verdagtes was egter nêrens naby nie. Die soektog en ondersoek duur voort.
Ons dra ons innige simpatie aan die gebroke familielede oor.
Inwoners van die dorp het Saterdagoggend blomme voor die huis (waar die voorval gebeur het) geplaas om hul medelye aan die familie te betoon.
