VLU Rensburg tak begin nuwe jaar in volle kleur
Die Vroue Landbou-unie Rensburg-tak het op 16 Januarie die nuwe jaar afgeskop met hul eerste vergadering en ook ‘n nuwe tema vir 2024, ‘Lewe in volle kleur’.
Nadat Anetha Hammond se gedig voorlesing oor die mooiheid van vrouwees, het die voorsitter Marty Jerling die vergadering amptelik geopen.
Jerling het tydens haar voorsittersverslag die lede bedank vir elkeen se deelname en het ook die sukses van die Rensburg-tak die afgelope jaar beklemtoon.
“Elkeen van die lede het ‘n passie vir die VLU asook om hul kennis te verbreed.
“Dis belangrik vir die lede om die oumas se gebak en kunswerke wat uitgesterf het weer te laat herleef,” het Jerling gesê.
Sy het genoem dat die lidmaatskap tot 30 lede in November gegroei het en haar hoop uitgespreek dat die passie nooit sal ophou nie.
Die spreker vir die dag was dr Reg Hammond, menslike ontwikkeling en prestasiespesialis. Sy boek Umoya wat gaan oor hoe om jou brein op te gradeer om jou persoonlike prestasie te bevorder, het aangepas by die tema om in volle kleur te lewe.
Oor sy boek Umoya, wat wind in Zulu beteken, het Hammond gesê dat wind verandering bring en dit hang af van elke mens hoe hy die verandering hanteer.
Die boek verduidelik hoe verstandelike en emosionele vaardighede benut kan word om jou doel te ontdek en uit te leef sodat jy die lewe in volle kleur kan geniet.
“Gee ‘n vrou kruideniersware en sy skep ‘n maaltyd. Gee haar ‘n huis en sy skep ‘n tuiste,” het Hammond gesê en bygelas dat vroue skeppers van formaat is en dit is wat die VLU vroue so spesiaal maak.
Tydens die vergadering is een van die skeppers van formaat, Betsie Knoesen vereer vir haar top prestasie met breiwerk waarvoor sy ‘n tweede plek by die 2023 kongres behaal het.
Anetha Hammond is gekroon as die VLU Rensburg-tak se lid van die jaar en Jerling het haar balkie aan haar oorhandig.
Petra Basson is ook tydens die vergadering spesiaal bedank vir haar bydrae en hulpvaardigheid.
Heilie van den Berg het net voor die vergadering verdaag het, vir Marty Jerling bedank as voorsitter en namens die lede hul waardering vir haar harde werk en leierskap uitgespreek.
Die dag is afgesluit met ‘n kleurvolle tafel gevul met smulhappies.
Die volgende vergadering sal op 20 Februarie plaasvind.
Kontak Jerling by 082 465 9343 vir meer inligting.
