Heidelberg klop Boksburg in Valke Merlin Liga kragmeting
Die eerste span het die eerste helfte oorheers met vier drieë, terwyl die tweede span Boksburg se tweedes met 50-5 verslaan het.
Heidelberg Rugbyklub het op 24 Mei hul tweede wedstryd in vanjaar se Valke Merlin Liga teen Boksburg Rugbyklub op die Hoër Volkskool velde gespeel.
Heidelberg eerstes het die wedstryd 29-10 gewen.
Die tuisspan het die eerste helfte oorheers en het teen halftyd ‘n 29-3 voorsprong gehad. Heidelberg het vier drieë in die eerste 40 minute aangeteken.
In die tweede helfte het die tuisspan in verdediging oorgegaan en kon nie regtig aan die gang kom nie.
Hulle het wel die meerderheid balbesit en grondgebied geniet, maar kon nie verdere punte aanteken nie.
Boksburg het in die tweede helfte die Heidelberg doellyn oorgesteek vir ‘n drie en ‘n suksesvolle doelskop.
Dié drie was die gevolg van ‘n agterlyn beweging van Heidelberg wat verkeerd geloop het.
Om suksesvol in dié strawwe liga te wees, sal elke span vir die volle 80 minute op hulle tone moet wees en konsentreer.
Foute gaan beslis uitgebuit word en kan in punte omskep word.
Heidelberg puntemakers was drieë: Morne Vermeulen (2), Nantus Mouton (1) en Alvin Jansen (1), doelskoppe: Francois Vorster (3) en strafdoel: Francois Vorster (1).
Heidelberg tweedes het Boksburg tweedes met ‘n 50-5 eindtelling gestoomroller.
Heidelberg speel hul volgende wedstryd op 31 Mei teen Vaal University of Technology (VUT) in Vanderbijlpark.
