Grendeltyd stokperdjie word groot versameling van 50cc motorfietse
Wat as ’n grendeltyd-projek begin het, het gegroei tot ’n versameling van meer as 200 motorfietse.
Die Heidelberg Erfenis Museum was op 31 Mei ‘n miernes van bedrywighede toe twee plaaslike motorfietsentoesiaste, Bossie Bossert en Peter Munro, hul versameling van 50cc-motorfietse uitgestal het.
Saam het die twee mans ongeveer 200 miniatuur 50cc- en ander 2-slag motorfietse in hulle versameling.
Wat in 2020 gedurende die Covid-tydperk as ’n stokperdjie begin het, het gegroei tot ’n indrukwekkende versameling.
Die motorfietse word meestal as stukkende motorfietse, wrakke of motorfietse wat nuwe of gerekondisioneerde enjins benodig, aangekoop, reggemaak en dan by die versameling gevoeg.
Die motorfietse word tans op twee plekke gestoor – Heidelberg en Kinross.
“Ons het in die grendeltydperk met net ’n paar motorfietse begin om onsself besig te hou,” het Bossie Bossert verduidelik.
“Ons stokperdjie het oor die afgelope vyf jaar mooi gegroei. Dit is ons passie en ons geniet dit om die motorfietse nuut te maak sodat dit behoue kan bly.”
