Met die oog op Nasionale Melktertdag (27 Februarie) het Solidariteit Helpende Hand se Heidelberg-tak saam met ATKV Heidelberg hande gevat om die dorp se eie melktertkoningin aan te wys.

Die uitnodiging was oop vir alle melktertbakkers en aspirantbakkers om hul gunstelingresep in te skryf.

Inskrywings kon enige variasie van melktert wees, mits dit self gebak is – wat dan ook die hoofreël van die kompetisie was.

Op 21 Februarie het talle bakkers opgedaag, elk met ’n smaaklike melktert in die hand wat deur beoordelaars én die gemeenskap geproe kon word.

Die tafels was van vroeg af gepak met interessante variasies, waaronder mini-melktertjies, melktert-kaaskoek en natuurlik ook tradisionele melkterte.

Die beoordelaars het behoorlik kop gekrap om die wenners aan te wys, aangesien die standaard besonder hoog was.

Na deeglike oorweging is die titel van 2026 se melktertkoningin aan Kobie Jansen toegeken. Jenny Labuschagne het die tweede plek behaal, terwyl Susan Lochem met die derde plek weggestap het.