Die Suikerbosoord nooi die gemeenskap uit na ’n unieke en inspirerende kunsoggend op 10 April, waar kreatiwiteit en geloof hande vat in ’n ontspanne atmosfeer.

Die geleentheid vind vanaf 10:00 in die saal plaas en sluit koek, tee, koffie en kunsgereedskap in. Die koste beloop R200 per persoon en die oggend word deur Annette Abbott aangebied.

Geen kunservaring of spesiale talent is nodig om deel te neem nie, aangesien die fokus val op die ervaring eerder as tegniese vaardigheid.

“Profetiese kuns is ’n vorm van geestelike uitdrukking waar kunstenaars Goddelike inspirasie, dikwels deur die Heilige Gees, gebruik om kunswerke te skep wat boodskappe van God oordra,” sê Annette.

“Dit fokus op die oordra van Bybelse waarhede, bemoediging, troos en genesing, eerder as slegs estetiese waarde. Hierdie kuns dien as ’n visuele boodskap of selfs ’n preek,” verduidelik sy.

Betaling kan op die dag geskied of vooraf per EFT gemaak word.