Jericho Ride bring motorfietsryers bymekaar
Motorfietsruiters van vêr en wyd het bymekaar gekom vir die optog.
Die Bronkhorstspruit se JITA Motorcycle Ministry het onlangs ’n kragtige Jericho Ride by die PPK Ligkruis Kerk in Bronkhorstspruit aangebied, waar motorfietsryers van heinde en verre saamgekom het om deel te neem aan dié besondere geleentheid van geloof en gemeenskapsbetrokkenheid.
Motorfietsryers van Brakpan, Nigel, Springs, Boksburg en Benoni onder andere het gesorg dat 40 motorfietse gebrul het vir oorwinning.
Die Jericho Ride is ‘n internasionale geleentheid waar motorfietsryers bymekaar kom op verskillende plekke op dieselfde dag.
Hulle skop die oggend af met ‘n kerkdiens, en ry daarna na verskeie punte in hul gemeenskappe om te bid waar daar ‘n nood is.
Die idee is dat, soos die Bybelse mure van Jericho, die mure van geweld, misdaad, dwelms en enige ander drukkende probleem in die gemeenskap sal val.
