HOK oud-studente onthou gewilde July-perderesies
Eerstejaarsvroue moes in kleurvolle uitrustings, hoede en sambrele 'n parade hou voor die resies begin.
Soos die oud-studente van die Heidelbergse Onderwyskollege (HOK) terugkyk op gebeure en tradisies in die aanloop tot hul 60-jaar-reünie in 2027, bly die July perderesies een van die grootste hoogtepunte.
Die July kamtige perderesies is by die kollege aangebied en het vir baie pret en vermaak gesorg. Dit was ook ‘n geleentheid vir eerstejaars om krediete te verdien vir ‘n kleurbaadjie.
Die mans moes latte soek om as hul “perde” te dien, waarna hulle in uitdunrondes meegeding het om vir die wedren te kwalifiseer.
Die vroue het intussen in kleurvolle uitrustings, hoede en met sambrele aan ‘n parade deelgeneem.
Daarna het die vroue die “ruiters” luidkeels vanaf die pawiljoen aangemoedig.
Die opleiding van onderwysstudente aan HOK het talle geleenthede gebied om hulle deeglik voor te berei vir onderwysposte waarvoor hulle aansoek gedoen het, deur hulle veelsydig toe te rus.
Die pawiljoen, atletiekbaan en rugbyveld was die hart van die kollege, waar talle aktiwiteite, soos die July-perderesies, plaasgevind het om studente vir hul loopbane as onderwysers voor te berei.
