Spar Superstars Intshonalanga 2024

UKUZIBANDAKANYA nemincintiswano yesikole ehlukene nokuphumelela ngamalengiso kuzifundo ikhona okwenza angaconsi phansi kothisha nakozakwabo uHlelokuhle Cetywa.

UHlelokuhle, 6, ofunda uGrade 1, eMalvern Primary School, akacushwa uma kunemincintiswano ehlukene esikoleni sakhe njengoba eyingenela yonke. Kanti uvamise ukumenyezelwa nabaphumelele ngenxa yokukhalipha nokumisela kwakhe. Nasemincintiswaneni yonobuhle yangaphandle kwesikole wenza ezibukwayo uHlelokuhle njengoba eseqoqe izicoco ezihlukene kusuka eqale ukumodela.

Ngaphandle kokuduma ngokwenza ezibukwayo ezifundweni, uHlelokuhle uphinde angaconsi phansi esikoleni sakhe njengoba ephinde adume ngokumodela. Lomfundi uthe into emenza agxile kakhulu esikoleni ukuthi ufuna ukuba uthisha uma esephothule umatikuletsheni.

“Uma sengiphothule umatikuletsheni ngifuna ukufundela izifundo zokuba uthisha kuzikhungo zemfundo ephakeme kuleli. Lokhu ngizokwenza ngoba ngiyakuthanda ukuba uthisha kanti futhi kuyiphupho lami,” kusho uHlelokuhle. Abamangali othisha bakhe uHlelokuhle ukuthi ufuna ukuba uthisha njengoba ebuye abonakale esiza ozakwabo ngokubachazela uma kukhona lapho bengaqondi khona egumbini lakhe lokufundela.

Uthe izifundo azithandayo naphumelela ngamalengiso kuzona kubalwa isiZulu, i-English, iMaths neLife Skills. Abantu abukela kubona uHlelokuhle uthe udadewabo omdala kunaye kanye nomama wakhe.

Uhlelokuhle uchazwa othisha bakhe njengomfundi ohloniphayo, ozimisela ngomsebenzi wesikole, olusizo kozakwabo nowaziyo ukuthi ufunani.

UNOSIHLE Mzolo ongumfundi waseSilverglen Primary School, uthi uyakholwa ukuthi ukusebenza ngokuzikhanda ikhona okwenza aphumelele ngamalengiso esikoleni nakuzinto ezihlukene.

Lo mfundi kaGrade 6, uyisibonelo kozakwabo abaningi ngengoba ephumelela kuzinto ezihlukene azingenelayo esikoleni nangaphandle. UNosihle akaconsi phansi kothisha bakhe ngokuthanda nanokuzikhandla ngomsebenzi wesikole.

Ngokusho kothisha bakhe uNosihle, akasali kuzinto ezenziwa esikoleni kanti futhi uvamise ukubalwa kwabaphumelele uma sekumenyezelwa imiphumela ngenxa yokuzimisela namakhono ahlukene anawo. Uma kunemincintiswano yesikole okubalwa iconquesta nespelling bee, uNosihle uhlezi ebalwa kwabathathu abaphumelele.

Lo kaMzolo esikoleni sakhe udume ngokwenza ezibukwayo ekumodeleni nasebholeni lomqakiswano. Ukunqoba izicoco ezihlukene emincintiswaneni yokumodela nakwelomqakiswano sekuholele ekutheni abe isibonelo esihle kozakwabo uNosihle. Lomfundi wenza ezibukwayo kuzifundo okubalwa isiZulu, i-English, iMaths, iLife Skills neNatural Science and Technology.

Ebuzwa ukuthi ufuna ukuba yini uma esephothule umatikuletsheni, uNosihle ubalule ukuthi ufuna ukuba udokotela ngoba uyathanda ukunakekela nokwelapha abantu.

Othisha bakhe uNosihle bathi ulusizo kozakwabo uma bedinga usizo kuzinto ezihlukene okubalwa izifundo nokunye. Ngezimpelasonto, uNosihle uveze ukuthi uchitha isikhathi ngokumodela nasenkonzweni.

Khonamanjalo, uNosihle usanda kumenyezelwa nabanqobile kumncintiswano wonobuhle waseThekwini iMr &Miss Ethekwini Municipality Role model 2024.

AKACONSI phansi kothisha nakozakwabo ngokwenza ezibukwayo ezifundweni nasekumodeleni uNqobile Khambule ongumfundi weKwaSanti Secondary School.

UNqobile, 13, owenza uGrade 8, udume ngokuphumelela ngamalengiso kuzifundo okubalwa isiZulu, i-English, iNatural Science neTchnology. Uphinde angaconsi phansi esikoleni sakhe ngokwenza ezibukwayo ekumodeleni.

Uma esephothule umatikuletsheni uNqobile uthi uzokwenza izifundo zokuba udokotela ngoba uyazifela ngakho. “Isizathu sokuba udokotela ukuthi ngiyathanda ukusebenza ngabantu nokubasiza uma begula. Esinye isizathu ukuqhamuka namakhambi azolapha izifo ezingomashayabhuqe emhlabeni,” kusho lomfundi.

Ngokusho kothisha bakhe uNqobile, ulusizo olukhulu kozakwabo uma bedinga usizo kuzifundo nokunye okuhlukene. Lo kaKhambule uthe uyakholwa ukuthi imfundo iyisisekelo sempumelelo. UNqobile uveze ukuthi ukumodela sekumufundise izinto eziningi okubalwa inhlonipho, ukuziphatha kahle, ukukhuluma phambi kwabantu, ukuzigqaja ngempilo yakhe, ukubuyisela emphakathini ukusho okumbalwa.

“Ukungenela imincintiswane yonobuhle ehlukene sekulethe injabulo empilweni yami ngoba ngifunde izinto eziningi ezinhle. Ngifundile ukuthi kubaluleke kanjani ukukhombisa bonke abantu uthando olufanayo kanjalo nokubuyisela emphakathini ukusho okumbalwa,” kubeka uNqobile.

Ubalule ukuthi uma esephumelele kulomkhakha ufuna ukufundisa intsha nezingane eziza emvakwakhe zangakubo ezinothando lokumodela. “Ngike ngizwe kuthiwa lugotshwa lusemanzi. Kubalulekile ukuthi intsha nezingane zifundiswe ngezinto ezahlukene kusenesikhathi ukuze zizokhula zibe nekusasa eliqhakazile. Inhloso yami ukuqinisekisa ukuthi intsha yangasekhaya ithola isinkwa sokuphila, ihambela kude nezidakamizwa kanye nokukhulelwa okungahleliwe,” kuqhuba lonobuhle.

UNqobile uveze ukuthi waqala ukumodela ngonyaka ka-2019, nalapho ayemodela khona esikoleni ayefunda kusona iBahlebonke Primary School. Mumva nje, uNqobile ufinyelele kowamanqambu kumncintiswano wonobuhle kazwelonke iMiss Teen Dove of Peace South Africa.

USAMKELISIWE Mnikathi ongumfundi waseSithokozile Secondary School, KwaDabeka, akaconsi phansi kothisha nakozakwabo ngamakhono akhe okubalwa ukudansa nokulingisa.

Lomfundi owenza uGrade 11, uyaziwa esikoleni sakhe ukuthi unekhono elimangalisayo kwezobuciko okubalwa ukudansa nokulingisa.

Uma esephothule umatikuletsheni uSamkelisiwe uthi ufuna ukwenza izifundo zokudansa nezokulingisa kuzikhungo zemfundo ephakeme kuleli ukuze ezoqhubeka nakuthandayo. Kanti othisha nozakwabo abamangali ukuthi ufuna ukwenza lezifundo ngenxa yamakhono akhe amangalisayo kwezobuciko.

“Isizathu sokufundela ukudansa nokulingisa ukuthi ngizokwazi ukubhekana nezinselelo eziqhamuka ohambweni lami ngiphinde ngikwazi ukuqhamuka namasu amasha okuzithuthukisa. Into engiyithanda ngokudansa ukuthi kuyangijabulisa uma ngikwenza futhi kungigcina nginomzimba olula,” esho.

Lo kaMnikathi uveze ukuthi isifundo aphumelela ngamalengiso kusona iBusiness Studies. Othisha bakhe bamuchaza njengomfundi olusizo kozakwabo uma bedinga usizo ngezinto ezihlukene. NgoMgqibelo uSamkelisiwe uchitha isikhathi sakhe ngokufunda izindlela zokudansa ezihlukene, enze imisebenzi yasekhaya neyesikole. Kanti ngeSonto uya esontweni.

Ebuzwa ukuthi ubani abukela kuyena osephumelele, uSamkelisiwe uthe ubukela kumaciko esigceme sakwa-A, KwaDabeka uDJ LAG noKC Driller. Uthe lamaciko amufundise ukulinda nokubekezela.