Jandré se oupa steeds in intensief
Daar is nog geen verbetering in die toestand van mnr. Neels Bezuidenhout wie se kleinseun, Jandré van der Walt (16), op 2 Oktober buite Ohrigstad gesterf het nie.
Jandré, sy meisie Igne Gouws en ’n gesinsvriend, Dirk Meyer, was saam met mnr. Bezuidenhout onderweg na Middelburg na ’n jagnaweek op Hoedspruit.
Sowat agt kilometer buite Ohrigstad het mnr. Bezuidenhout vermoedelik ’n ligte beroerte agter die stuur gehad en die Fortuner het gerol.
Jandré is uit die voertuig geslinger waarna dit bo oor hom gerol het.
Hy is op die toneel dood terwyl mnr. Bezuidenhout en Igne Life Midmed toe geneem is vir behandeling.
Beide het ligte beserings opgedoen, maar mnr. Bezuidenhout het kort na sy opname ’n hartaanval gehad.
Honderde mense het die week na Jandré se afsterwe ’n roudiens vir hom bygewoon in HTS Middelburg se ouditorium.
Sy oupa was nie daar nie en ’n spesiale gebed is vir die spoedige herstel “van Jandré se jag buddy” gedoen.
Jandré se ma, Magda, het tydens talle onderhoude met www.mobserver.co.za gesê “dat Jandré soos sy oupa se skaduwee was”.
Mnr. Bezuidenhout het hom gereeld geneem om te gaan jag en was ’n ware bok vir sports, soos gesien kon word op die skyfievertoning op Jandré se roudiens waar sy oupa ook saam met hom glybane aangedurf het.
“Daar was nog geen verbetering in sy toestand nie,” het Magda Dinsdag bevestig.
Hoewel mnr. Bezuidenhout nou en dan sy oë oopmaak reageer hy nie op gesprekke nie en verloor gou weer sy bewussyn.
“Hy sal binnekort oorgeplaas word Life Eugene Marais Hospitaal toe waar daar begin sal word met intensiewe rehabilitasie en terapie,” sê Magda.
Intussen word mnr. Bezuidenhout steeds behandel in Kosmos Hospitaal se intensiewesorg-eenheid voor sy oorplasing teen laat dié week of vroeg volgende week.
Vorige stories oor ongeluk:
Seun (16) in ongeluk oppad terug van jagtog
Oupa kry hartaanval na dood van kleinseun
Honderde neem afskeid van belowende HTS rugbyspeler
Ander nuus:
Trane soos riviere by prysuitdeling
Geliefe aan die dood afgestaan? Kerke vat hande om die ondraaglike draagliker te maak
Nuus op ’n drafstap
Kry nuus op ’n drafstap. Stoor ons bystand nommer (072 248 3855) op jou foon, stuur ’n WhatsApp boodskap met die woorde “Add me” om nuus flits skakels op jou foon te kry.
