Llewellyn van der Merwe (15) is Dinsdag net na 17:00 laas gesien toe hy by sy ouerhuis weg is sonder om hulle in te lig waarheen hy gaan. Verskeie leidrade is opgevolg en soekgeselskappe het tot laat nag op die Stoffbergpad uitgejaag toe daar gesê is dat die seun daar opgemerk is.

Vanoggend vroeg het iemand laat weet dat hulle hom by die bushalte in Oosstraat gesien het. Iemand het toe by sy skool in eMalahleni gewag en verlig laat weet dat hy daar opgedaag het.

Die seun se ma, Daleen, sê dat hy nog glad nie wil sê waar hy was nie. Sy was Woensdagoggend dood moeg, maar dankbaar dat haar kind veilig is. Mev. Van der Merwe het almal wat help soek het en veiligheidsgroepe wat die seun se foto versprei het, bedank vir hul hulp.