Krokkewaan het dorp op hol
’n Waterlikkewaan wat as ’n krokodil aangesien is, het inwoners Sondag op hol gehad in Aerorand en Uitbreiding 18.
Die spekvet mannetjie het seker met al die nattigheid die afgelope tyd sy pad gevind tot by die Pretoriushuis in Bamboesbergstraat, Aerorand.
Daar het mnr. Pretorius gesien hoe die knaap agter die fontein, waar hy seker lustig in die water gespeel het, uitspring en koers kies na die hek toe hy hom opmerk.
Lees ook: Koue krokodil in rivier
Die oomblik toe die hek oopgaan, het die likkewaan met ’n spoed gehardloop in die rigting van Uitbreiding 18, waar hy later met die hulp van die
Dierebeskermingsvereniging en Fanie Strydom (Herpetologiese Vereniging) gevang en losgelaat is.
Lees ook: Krokodil trek bees die water in
Daar moet gemeld word dat hy só spekvet en groot was, dat van die mense in die omgewing gedink het dit is ’n krokodil. Dan doop ons hom maar Middelburg se eie krokkewaan!
•’n Volledige berig verskyn in die Dinsdag uitgawe van die Middelburg Observer.
