Lecia Steele het die prys gewen vir die grootste roofvis, ’n Wahoo van 9.8kg, by die Queens of the Ocean hengelkompetisie die naweek in St Lucia.
Gure weer skrik ons Middelburg vrouehengelaars nie af nie en hulle het Saterdag hul slag gewys by dié hengelelkompetisie op St Lucia.
Die groep het bestaan uit Johan Swart (gilly), Chris Myburg (skipper), Claire Burger, Lecia Steele, Maryn Viljoen, Carmen Breedt en Fransien Myburg, wat op die Aqua Joy-boot deelgeneem het.
Lecia vertel hoe Fransien vir 45 minute gespook het met ’n marlyn, maar toe hulle hom wou nader trek, het hy losgekom.
Hulle het darem nie heeltemal met leë hande teruggekeer nie en Lecia het die span se naam hoog gehou met haar wenprys.
•Vrydagaand het die Middelburgers die oog gevang met hul “Rock & Roll” kleredrag wat hulle tydens die spanbou en saamkuier geleentheid gedra het.
•Vir hul besoek aan St Lucia het die groep vroue hul pienk stewels saamgeneem ten bate van borskankerbewusmaking.
Hulle het dit gekoop by Nicolien Vorster, ’n Mev. Mpumalanga finalis, wat die stewels verkoop vir die borskankerbewusmaking.
Lecia het genoem dat die bewusmaking van borskanker haar baie na aan die hart lê, omdat haar ma borskanker gehad het en sy self ook die borskanker gene het.
