ISilo samabandla onke iNkosi u-Goodwill Zwelithini kaBhekuzulu ubabele endaweni yaseNondweni, eNquthu ukuzogcoba ngokusemthethweni iNkosi yesizwe sakwaHlatshwayo, iNkosi uPraisegod Funukwazi Hlatshwayo. Lomcimbi ububanjelwe endaweni yase Nondweni ezinkundleni zemidlalo zakuyo lendawo. Izinkumbulu zabantu ebeziphuma ezindaweni ezahlukene bezihlobe zizinhle zizobungaza kunye nabomndeni wakwaHlatshwayo lolusuku oluyi nqophamlando.

ISilo besingahambi sodwana besiphelekezelwa nguNdlunkulu u-Zola Mafu wase Swazini. Phakathi kwezicukuthwane ebezikhona bekunguNgqongqoshe weZolimo nokuThuthukiswa koMphakathi, uMnuz Cyil Xaba, iMeya yaseNdumeni, Thulane Mahaye, aMakhosi kanye neziNduna ebeziphuma ezindaweni ezahlukene zakhona eNquthu kanye nezasemikhandlwini eyehlukene yaKwaZulu Natal.
‘Ungangezwe lakhe,’ iSilo, ungenele abezindaba ngodaba lokushaywa kwabantu bokufika nokuwudaba olube undabuzekwayo emhlabeni jikelele wathi ‘lokhu okwenzekile bekuyitulo elisetshenziswe ngabathize ngenhloso yokuthunaza isithunzi sakhe nesizwe sakwa Zulu.’
Kodwa uthi okumujabulisile nokumenze waziqhenya ukuba iNkosi yamaZulu ukuthi abantu besizwe sakhe bayalalela. “Ngibonga ukungilalela kwenu sizwe sakhithi. Umhlaba wonke kumele wazi ukuthi kusukela manje sesibheke indlela eyaphambili,” kusho iSilo.

Uthe yena akalile nokuthi abantu bokufika bangenise kulelizwe kepha ufuna ukuba kuqinisekiswe ukuthi balapha ngokomthetho. Uthi laba abafike bavule amabhizinisi emaphandleni kumele babikwe eziNduneni naseMakhosini, kuqinisekiswe ukuthi izincwadi zabo zokuba kulelizwe zisemthethweni. Ube esekhuthaza izinkumbulu zabantu ekade zithamele lomcimbi ukuba ziyeke ukuhlala emakhaya ‘azivuke ziyolima’ ukuze zingabulawa indlala.

Uthe lokukwenza kwabantu ukuba bashaye abokufika bese bebatshontshela izimpahla zabo kungezinye zezinto ezikhombisa ukuthi abantu balambile babulawa indlala. Uthi “amaphoyisa awenze umsebenzi wawo abophe izigila mkhuba.” Ukugcizelele ukuthi “amadoda awayeke ukuhlala ematshwaleni, awayolima ukuze ezokwazi ukondla imindeni yawo.”
INkosi yakwa Hlatshwayo u-Funukwazi Hlatshwayo uxoshiswe ngezipho ezivela kusona iSilo. ISilo siyale iNkosi ukuba ngathi ingafuza igama layo ifune ulwazi kabanzi ngosiko lakwaZulu.