Kuhlomule abamabhizinisi amancane

Osomabhizinisi abancane bacule ingoma efanayo nabasebenzi boMkhandlu wase Nquthu behlomuliswa ngezitifiketi ezihambisana nezinsizakusebenza ngaphansi kohlelo lwe Mayoral Project and Poverty Alleviation oluyinhlanganisela ye-SMME Awards ngaphansi kohlelo lukazwelonke lwe-Local Economic Development.

Lomcimbi wokukhuthaza kanye nokuhlomulisa osomabhizinisi abancane ubuholwa nguSodolobha uKhansela N.E. Molefe ehambisana nabasebenzi boMkhandlu kanye namakhansela amawadi. Lwaqalwa ngonyaka ka 2011 ukuze kuthuthukiswe osomabhizinisi abasafufusa nemifelandawonye ukuba iqhubekele phambili ngokwakha amathuba emisebenzi kulwiswane nobubha emaphandleni.

Minyaka yonke umnyango wozokuthuthukisa komnotho wohulumeni basekhaya uhlunga amabhizinisi amabili iwadi ngalinye asekulungele ukuklonyeliswa ngezitifiketi nezinsizakusebenza. Kulonyaka kuklonyeliswe amabhizinisi angamashumi ohlobo oluhlukahlukene. Angu 34 awomfaniswano wokugqoka kwezobuciko namasiko okubalwa kuwo inhlangano ‘Omama Bobumbano’ abanandisa ngesigekge. Izinkampani ezihweba ngemicimbi zona zihlomule ngezitsha, izitofu kanye namathende, amatafula nezitulo zakhona. Amakhompuyutha nama-Printer, izinsiza kusebenza zezinkontileka ezihweba ngokwakha.

Amabhala nezimfolomo kunikwe kubahwebi bezitina zokwakha. Imishini yokuthunga kulabo bahwebi benqephu. Izinto zokubiyela izingadi kubahwebi bezolimo kanye nezinkukhu.
USodolobha uthe ubonge amakhansela amawadi ngokuzimbandakanya ngokuthembeka nangokuzimisela bebambisene kuloluhlelo.

Ube esexwayisa osomabhizinisi ukuba bafunde isifundo kulabo abahlomula phambilini kuloluhlelo njengoba kucaca ukuthi basebenza ngokuzikhandla. “Njengoba senitholile, ningakhohlwa ukuthi baningi enibashiye endleleni, ngakho nizibambe ziqine. Umuntu makangasebenzi unyaka owodwa bese ephelela endleleni ngoba kukhulu okuza ngonyaka ozayo,” kusho uSodolobha ekhuthaza abaklonyelisiwe. Abahwebi abahlomula ngonyaka ophelile banikwe ithuba lokuphefumula lapho beveze ngoshintsho oludalwa iloluhlelo emabhizinisini abo nabathe luyasiza kakhulu.

UFukang Molefe weThusanang Dithabong, ekhiqiza izitina zokwakha eSlonjane, kwa-Ward 16, wahlomula ngegenerator yokuxova udaka. Phambilini ubekhiqiza izitina ezingu-500 ngosuku, namuhla usekwazi ukukhiqiza ezinu-1200. Uthi inkampani yakhe isithuthukise umphakathi wangakubo ngokuvula amathuba omsebenzi angu-17. “Loluhlelo luka Sodolobha luyasiza kakhulu.” UMolefe unxuse abahlomulile ukuba bazimisele ngokusebenza ngoba ‘le nhlanhla ayandele bani,’ kepha bangathathi izinsizakusebenza bazibeke emsamo.

UTumelo Skhosana we Lefoko Holdings, eZicole, kwa Ward 13, naye owahlomula ngonyaka ophelile uthe ubonga kakhulu ku Mbuso Molefe ohola umnyango wakwa-Local Economic Development ngesineke sakhe sokusiza osomabhizinisi, waphinda wabongela uSodolobha ngezisebenzi zakhe ezisemkhandlwini ezenza kahle.

UMamthembu weMwezeni Construction ezinze kwaVulamehlo, ku-Ward 14, uthe “kunzima ukuqala ibhizinisi kodwa kumele uphokophele ukuze uphumelele, abantu mabasukume baqale amabhizinisini balwe nobubha, ningesabi ukuxhumana noMkhandlu ukuze nithole ulwazi ngoxhaso nokuthuthukisa amabhizinisini enu, bese niyaqinisekisa ukuthi amabhizinisini enu niyawabhalisa njengabahwebi abasemthethweni.”