Umphakathhi waseNtanyandlovu, ngaphansi kuka (Ward 11) kuMasipala waseNquthu, ube senhlanhleni yokuvakashelwa yiminyango ehlukene kahulumeni.
Lokhu kwenzeke ngaphansi kohlelo lokuqwashisa ngokuhlukumezwa okuqondiswe ezinganeni nabesifazane. Umphakathi ububuthane ehholo lomphakathi wakulendawo, ngomhlaka 6 December nyakenye. Bekukuzolalelwa izikhulumi ebezivela eminyangweni eyahlukene kahulumeni.

Ethula inhloso yomhlangano, uNobhala ka-Operation Sukuma Sakhe eNquthu, uMnumzane Skhumbuzo Shabalala, unxuse umphakathi ukuba ubambisane ubike nanoma ngabe yikuphi ukuhlukumezeka okwenzekayo. “Silapha namuhla ukwenanela ikhwelo likamengameli wezwe obethula lomkhankaso emavikini amabili adlule esifundazweni saseLimpopo. Nathi sizokhuthaza ukuba nibike lonke uhlobo lokuhlukumezeka okwenzeka emiphakathini.
Sizobabaza sikhuze yonke imikhuba emibi eyenzeka emiphakathini yethu,”kusho uShabalala.

Uthe abantu abayeke ukuhlukumeza izingane kube kusetshenziswa usiko lokuthwala. Waphinda wachazela umphakathi ngezinhloso zohlelo lukahulumeni wesifundazwe olubizwa ngo- Operation Sukuma Sakhe.

Ukhuthaze umphakathi ukuba ulusebenzise loluhlelo uphinde uvakashele i-War Room yakulendawo njengoba ingenye ehamba phambilil i-Nquthu yonke. Uphinde wabonga umsebenzi omuhle owenziwa umdidiyeli we-War Room uNkosazane Phumzile Ndlovu.

Iminyango kahulumeni ithule izinkulumo ezakhayo okufaka uMnyango wezeMpilo, ezeNhlalakahle nokuthuthukiswa kwezomnotho, iKhomishana yoKhetho, owokuXhumana noKwazisa, kanye nezinhlangano ezisizayo zingabheke nzuzo.

Enkulumweni ebithulwa uKhansela wewadi uMabilabila Kunene, emazwini akhe okubonga loyo ubonge kakhulu umphakathi ngokuba yinxenye yalomkhankaso.

“Sithokoza kakhulu ukuba nize ngobuningi benu emihlanganweni efana nale. Intuthuko yokuqala ukucosha ulwazi. Lolulwazi enilucoshe namuhla luyisikhali sokulwa nazo zonke izinqinamba enizohlangabezana nazo empilweni. Sifisa ukunibonga ngokusethemba enakukhomisa kithi mhla nisikhetha kulolukhetho olwedlule.
Nakuba kusenezinkinga emkhandlwini waseNquthu, kodwa siyanethembisa ukuthi maduze zizodlula, umsebenzi uqhubeke” kusho uKhansela. Amalunga omphakathi awujabulela lomkhankaso, njengoba enikwe nethuba lokuphawula nokubuza imibuzo.