I-NHBRC iqeqesha umphakathi waseSibongile ngokwakha izindlu
UKhansela Siphamandla Kheswa uphethe lolu qeqesho ngokunxusa abazongenela lolu hlelo ukuthi basebenzise amakhono abasanda kuwathola ukuthuthukisa umphakathi wabo kanye nempilo yabo, njengoba ukuntuleka kwemisebenzi kusaqhubeka nokuba yinkinga.
Umphakathi wakuWadi 5 kanye nekhansela lendawo lisanda kuhlangana ehholo lomphakathi ukuzoqeqeshwa yiNational Home Builders Registration Council (NHBRC) ngokubaluleka kokubhaliswa kule nhlangano.
Ngokuhamba kwezinsuku ezintathu, ababambiqhaza bafunde ngomgomo we-NHBRC wokuvikela abathenga izindlu kanye nokulawula imboni yezokwakha ngokuthuthukisa ubuchwepheshe obusha, ukubeka izindinganiso, nokuthuthukisa amakhono abakhi.
Ngokubhalisa ne-NHBRC, abakhi bayavikeleka ezenzweni ezingezinhle zokwakha, njengoba abahloli benhlangano bezoqinisekisa ukuthi izindlu zisesimweni esihle. I-NHBRC iphinde ingenelele ezimali, ukubhaliswa kwabakhi, ukuhlolwa kwezindlu, kanye nezinsizakalo zokulamula phakathi kwabakhi nabathengi.
“Ngokubhalisa iphrojekthi yakho yokwakha ikhaya ne-NHBRC, ungazivikela ezenzweni zokwakha ezingekho ezingeni.
Ithimba lethu labahloli bekhwalithi yokwakha lizohlola ngokucophelela ukwakhiwa kwekhaya lakho ukuze liqinisekise ukuthi isakhiwo sendlu oyakhile iphephile futhi iqinile,” kuchaza umqeqeshi uMnz Siyanda Khathi.
Uphinde washo nhokusobala, uhla olubanzi lwemisebenzi ye-NHBRC lufinyelela ekuvikeleni abakhi nabanikazi bezindlu ngezimali, ukubhalisa abakhi, ukuhlolwa kwezindlu, ukuxazulula izingxabano, nokusingathwa kwezikhalazo.
“Uma usebenzisama ne-NHBRCv eceleni kwakho, ungaqiniseka ukuthi iphrojekthi yakho yokwakha ikhaya izoba yimpumelelo emangalisayo.
UNksz Noxolo Sokhela, ongumxhumanisi woMnyango Wezokumaketha, ugcizelele ukubaluleka kokwakhiwa kwezindlu ezifanele nezihlala abantu, wachaza nokuthi iNHBRC ibhalisa izinkampani zokwakha, abakhi ngabanye kanye namathimba ukuze baqinisekise ukuthi kwakhiwa izindlu ezisezingeni eliphezulu.
UKhansela Siphamandla Kheswa uphethe lolu qeqesho ngokunxusa abazongenela lolu hlelo ukuthi basebenzise amakhono abasanda kuwathola ukuthuthukisa umphakathi wabo kanye nempilo yabo, njengoba ukuntuleka kwemisebenzi kusaqhubeka nokuba yinkinga.
