Sowat 5 000 eerstejaars en hulle ouers is vanjaar by die NWU se Potchefstroomkampus verwelkom.

In sy toespraak aan die groep het prof. Fika Janse van Rensburg, adjunkvisekanselier van die NWU, gesê dat die NWU gekies het om nie enkeltalig Engels te wees soos baie ander universiteite nie, maar dat daar ’n multitalige beleid op die NWU is wat Afrikaans, Engels en Setswana/Sesotho insluit.
Volgens hom het spesifiek die Potchefstroomkampus wat volgende jaar 150 jaar oud is, ’n geskiedenis van verandering, daarom moet mense nie weg sku vir verandering nie.

“Ons toets onsself deurlopend aan wat as universeel belangrik beskou word,” het hy gesê.
Aangesien die kampus volgende jaar 150 jaar oud word, het prof. Janse van Rensburg gevra watter studente as tweede, derde of vierde generasie hulself by die kampus aansluit. Daar was inderdaad een student wat ’n vierde generasie Puk is.
Die Registrasie en Oriëntering program (R&O) waar eerstejaars stelselmatig bekendgestel word aan die universiteit, is al sterk aan die gang. Dit sal uitloop op die jaarlikse vlotoptog wat vroeg in Februarie sal plaasvind.