Oor jare is die gemeenskap van Parys se harte en hande oop vir Vrystaat Versorging in Aksie (VVA) en die werk wat hierdie welsynsorganisasie in die gemeenskap doen. Dié keer kon VVA egter terug gee aan die gemeenskap danksy ‘n serpskenking van die Golden Triangle Chamber of Commerce (GTCoC).

Die serpe is oorspronklik deur mense oor die land gehekel vir die Guiness-wêreldrekord poging wat in 2024 tydens die sakekamer se Rocking the Vaal-inisiatief opgestel is toe al die serpe, wat vir die inisiatief gehekel is, aanmekaar gewerk is om ‘n serp van 35,34km te kon maak. Daarmee is die vorige serp-rekord van 35km verbeter.

Die doel van die rekordpoging was juis om weer uit te reik na gemeenskappe, en is 1 760 van die serpe aan VVA Parys geskenk.

Dié serpe asook ‘n aantal musse is deur VVA Parys onder volwassenes en kinders in die Parys, Tumahole en Schonkenville gemeenskappe versprei.