Matrikulante van 2024 se lang wag vir hul uitslae is so amper verby. Die IEB (Independent Examination Board) uitslae sal net na middernag op 14 Januarie beskikbaar wees, en die NSS (Nasionale Seniorsertifikaat) uitslae vanaf 06:00 op 14 Januarie.
Goeie nuus is ook dat eksamennommers en uitslae wel vanjaar op aanlyn platforms en in koerante gepubliseer sal word nadat die hooggeregshof in Pretoria gister die Inligtingsreguleerder (IR) se dringende aansoek tot die hof om te keer dat die uitslae gepubliseer word, van die hand gewys het.
Sou daar foute met name of identiteitsnommers op matrikulante se uitslae wees, moet dit voor 21 Februarie by die departement van onderwys aangemeld word. Daar is ook 30 dae tyd vir navrae oor uitslae nadat die uitslae bekendgemaak is.
Die Departement van Onderwys sal Maandag om 16:00 tydens ‘n inligtingsessie ‘n opsomming van die 2024 uitslae en terugvoer oor die Nasionale Seniorsertifikaat-eksamen gee, gevolg deur ‘n glansgeleentheid later die aand.
