Hoërskool Riebeeckrand is baie opgewonde oor hul nuutgekose pom-pom-groep en is reeds besig met hul voorbereiding vir die opkomende Randfontein Skou Pom-Pom-Kompetisie.
Volgens die bemarker van Hoërskool Riebeeckrand, Rickus Kruger, het hul pom-pom audisies al reeds in Oktober verlede jaar plaasgevind.
Dit is tydens dié audisies waar Riebeeckrand 25 leerlinge gekies het om deel van hul 2014 pom-poms te wees.
“Vanjaar se pom-poms bestaan uit 18 dogters en 7 seuns. Ons is baie opgewonde oor die groep en glo dat hulle verskeie hoogtepunte gedurende die jaar gaan behaal,” vertel Rickus.
Hy vertel verder dat dié groep volstoom aan die oefen is en hand aan hand saam met hul choreograaf, Vumile Mphande, werk.
“Vumile is tans ‘n student aan die Arts School in Johannesburg en gaan beslis ‘n groot impak op vanjaar se roetine hê,” vertel Rickus opgewonde.
