Seun ernstig beseer toe boomtak breek

 ‘n Dertienjarige leerling van Laerskool Randfontein het onlangs ernstige beserings opgedoen toe hy kop eerste uit ‘n boom van omtrent 3,5m hoog geval het.

Die impak van sy lyf op die teerpad het veroorsaak dat hy sy linkersleutelbeen gebreek het. Hy het ook skedelbreuk en harsingskudding opgedoen.

Adriaan van der Westhuizen het saam met sy jonger broer in hul voorerf boom geklim toe ‘n tak waaraan hy gehang het, afgebreek het.

Hy het in die teerpad geval en was dadelik bewusteloos. Sy broer het die buurman en hul ma gaan roep.

“Toe ek by my seun kom was my buurman klaar besig om te verseker dat sy lugweë oop is,” het Lotta van der Westhuizen, Adriaan se ma gesê. Volgens Lotta het Adriaan ‘n paar keer sy bewussyn verloor en dan weer bygekom.

“Die paramedikus wat op die noodoproep gereageer het, het hom dadelik gestabiliseer. Sy sleutelbeen het deur sy vel gesteek,” het Lotta vertel.

Hy is na Netcare Milpark Hospitaal se trauma-eenheid geneem waar hy verdere mediese sorg ontvang het. Lotta het gesê die ambulansrit was senutergend omdat Adriaan heeltyd van pyn geskreeu het.

“Ek het heeltyd in intensiewe sorg gebid en gesê; ‘Here ek gee nie om hoe U hom vir my gee nie, ek soek net my seun’,” het Lotta gesê. Adriaan is later na Netcare Krugersdorp Hospitaal oorgeplaas en is ‘n week later ontslaan. Sy sleutelbeen is met ‘n staalpen en skroewe geheg.

“Hy kan nou nie eers meer boomklim nie, en mag ‘n maand lank nie skool toe gaan nie – hy is nou letterlik geskroef,” het Lotta gesê.

Het jy dalk meer inligting rakende dié storie? Stuur gerus vir ons ‘n e-pos na randfonteinherald@caxton.co.za (sluit asseblief kontakbesonderhede in) of skakel ons by 011 693 3671.

Lees ook: 

Boy 11, drowns in river while playing with friend

Vir daaglikse gratis gemeenskapsnuus aan die Wes-Rand, besoek ook ons susterkoerante se webtuistes Roodepoort Record, Krugersdorp News en Get It Joburg West Magazine

Besoek ook ons Facebook, Twitter en Instagram blaaie om jou stem te laat tel!