Martin Olckers, 22 wat op Dinsdag, 1 November glo erg deur ‘n voetganger aangerand is, het sy kant van die storie vertel.

Volgens hom het die voorval ongeveer 2nm in Pullingerstraat, Venterspos plaasgevind.

Olckers het vertel dat hy op die spesifieke dag op sy fiets op pad huis toe by ‘n winkel gestop het om ‘n plastieksak te kry om sy selfoon in te sit, siende dat die weer begin opsteek het.

Normaalweg sou Olckers nie die pad deur Venterspos geneem het nie, maar hy het voorheen by ‘n vriend gehoor dat dit die maklikste pad was as die weer opsteek.

In Pullingerstraat het hy 40 kilometer per uur gery toe hy ‘n man langs die pad sien sit het. Toe sien hy die man onverwags opstaan en voor hom probeer inloop.

Olckers het probeer om die man mis te ry, maar toe val hy.

“Ek het die man gevra wie nou die skade aan my fiets gaan betaal, waarop hy my geklap het. Ek kon nie net daar staan nie en ek en die man het mekaar toegetakel.”

Olckers het verder vertel hoe vyf werkers wat oranje klere aangehad het, hom met klippe gegooi het. “Die klippe was so groot soos ‘n nommer vyf skoen.”

Volgens Olckers was die heel ergste vir hom dat daar ‘n man met ‘n swart broek en wit langmouhemp aan, glo ook by die geveg betrokke geraak het. Die man het hom na bewering ook geslaan, op hom gaan sit en probeer wurg het. Daarna het Olckers sy bewussyn verloor.

Die Herald is tans besig om kommentaar van die Westonaria Polisie af te kry.

Also read:

Second cyclist killed in less than a week

Teenage cyclist run over and killed

Cyclist killed after being hit by SUV