Die driejarige Louisa Cornelia Susanna van der Merwe (beter bekend as Poppie), wat na bewering deur haar stiefpa vermoor is, se begrafnisdiens is vandag (4 November) vanuit die Nederduitsch Hervormde Kerk gehou. Die diens is waargeneem deur ds Yolandi Benadié, wat vir Poppie geken het en haar gedoop het.

Dit was vir die Herald duidelik dat Christo van der Merwe, Poppie se biologiese pa, ‘n gebroke man is. Hy het voor in die kerk oor die bank se rugleuning geleun terwyl hy hardop gehuil en woorde geprewel het.

Die begrafnis was ‘n intieme geleentheid. Poppie se ma, Louisa Koekemoer, het aan die ander kant van die bank by haar seun, Jaco Els en dogter Marlise Els gesit. Omtrent 16 van Van der Merwe se familie en vriende het naby hom gesit en hom probeer kalmeer.

Marlise (halfsuster) het ‘n hartroerende brief vir haar sussie voorgelees.

Tydens die diens was Louisa kalm, maar duidelik getraumatiseer. Toe daar skyfies gewys is van Poppie toe sy kleiner was, kon sy en Van der Merwe nie meer hul trane bedwing nie. Die Herald het opgemerk dat albei Louisa se oë blou was van die kneusplekke.

Die draers was Jaco Els, Poppie se halfbroer; Marlise Els, haar halfsuster; Christo van der Merwe, haar pa; en Johan van der Merwe, haar oupa.

Ds Benadié se boodskap het kalmte onder die familie gebring, en daarna het almal in ‘n stoet na die Westonaria Begraafplaas vertrek. By die begraafplaas het emosies hoog geloop. Van der Merwe het ‘n beertjie in die graffie geplaas, en elkeen daar kon vir Poppie vereer deur blomblaartjies in haar graffie te strooi.

Poppie van der Merwe wat volgens familie, vriende, die gemeente en baie ander in die gemeenskap ‘n pragtige kind van binne en buite was, is tydens ‘n hartseer, maar baie mooi diens ter ruste gelê. Poppie sal vir baie mense die blou-oogprinses bly.