Nuwe boek bring nuwe hoop vir vroue

Plaaslike skrywer Rolanda le Roux het haar boek Voetstoots op Saterdag 9 Julie bekendgestel.

Talle dames het by die Espresso-koffiewinkel by Betesda Bedieninge bymekaar gekom om na Rolanda te luister en haar te ondersteun met haar boekbekendstelling, en daar is die middag ook lekker gekuier en geëet.

“Die boek handel oor seer en vra wat ‘n vrou soms vra wanneer sy uit plek en minderwaardig voel.”

Sy wil vroue deur haar boek motiveer om hul koppe op te lig, en op God te fokus en op dit wat hy in hulle gedeponeer het, en diep in hul gees te luister hoe die Here hulle bedien.

Rolanda het gesê dat sy gedurende die dag beslis uit haar sokkies geseën is en met trots kan sê dat sy 70 vriendinne het wat diep in haar hart gekruip het. Sy het vertel dat sy soveel terugvoer gekry het van vroue wat werklik iets ervaar het.

“Die ondersteuning van die vroue was ongelooflik spesiaal. Vir elke vrou wat daar was wil ek bemoedig deur vir hulle te sê hulle maak saak, en is spesiaal. Onthou jy is die blessing, ‘n warrior en ‘n oorwinnaar, en jy is ongelooflik in jou eie reg.”