Warm harte bring hoop aan SOS Women and Children Foundation
Anastasia Venter en haar gesin het 'n dag van bederf gereël vir die inwoners van die SOS Women and Children Foundation om 'n verskil in die lewens van ander te maak.
Die SOS Women and Children Foundation het onlangs kosbare skenkings ontvang van die Blessed to Bless Rainbow Foundation.
• Lees ook: Help the SOS Women and Children Foundation win the abusive fight
Anastasia Venter, stigter van die organisasie, vertel dat SOS haar genader het nadat hulle gehoor het sy voorsien kos aan minderbevoorregtes. Sonder om twee keer te dink, het sy hulle besoek en onmiddellik besluit om betrokke te raak.
Ek het twee kinders kaalvoet in die koue sand sien speel. My hart het gebreek. Hierdie plek probeer vroue en kinders help wat trauma oorleef het, maar hulle het beperkte hulpbronne.
“Ek kon die seer en verwaarlosing in daardie kinders se oë sien. Ek het toe vir my man en kinders gesê ‘ons móét iets doen’. Al is dit net een dag wat hulle nooit sal vergeet nie, is dit genoeg,” het Anastasia gesê.
Sy het God geloof dat alles betyds in plek geval het. Op die dag het hulle hamburgers aan sowat 80 mense uitgedeel, asook sakke vol klere en skoene vir oud en jonk. Die kleuterskool het speelgoed, boeke, legkaarte en skryfbehoeftes ontvang, en ’n springkasteel en lekkernye het die kinders se dag opgehelder.
“Dit was soos ’n winter-Kersfees vir die kinders. Die opregte glimlagte en drukkies, saam met die ‘dankie tannie’, sal ek vir altyd onthou,” sê sy.
Sommige vroue het ook die bejaardes en ander mammas bederf deur hul naels te doen – ’n eenvoudige, maar liefdevolle gebaar.
Ons het besef hoekom ons op hierdie pad is – om te dien met nederigheid. Die Here het hierdie dag moontlik gemaak,” sê Anastasia.
Haar dryfkrag? Die opregte dankbaarheid van dié wat swaarkry.
“As jy self ’n moeilike kinderjare gehad het, wil jy ’n verskil maak. Kinders en diere lê my baie na aan die hart. Hulle is weerloos. ’n Klein drukkie is dalk al wat hulle het om te gee, maar dit beteken vir my die wêreld.”
Sy beskryf die dag as ’n reuse sukses met ondersteuning selfs van so ver as Roodepoort.
“Baie dankie aan elke persoon en besigheid wat bygedra het – elke klein bietjie maak ’n verskil.”
Anastasia sê haar doel is om mense bewus te maak dat dinge wat ons as vanselfsprekend beskou, vir ander van onskatbare waarde is.
“Ons is almal mense, ongeag kleur, ras of ouderdom. Ons is deur een God geskape. My missie is om dit uit te leef en ander te inspireer om saam ’n verskil te maak.”
Die organisasie gaan voort om die kleuterskool by SOS te ondersteun, sowel as hul weeklikse uitreike na minderbevoorregtes.
“Ek beplan nie altyd vooruit nie, want dinge gebeur soos dit moet. Nuwe projekte dien hulself aan. Maar met meer ondersteuning kan ons groter gaan. Ek droom ook daarvan om ’n projek vir diere in nood te begin.”
Skenkings van klere, skoene, skoonmaakmiddels, sanitêre produkte, tweedehandse skryfbehoeftes, speelgoed, boeke en nie-bederfbare kosse word opreg waardeer. Komberse vir mense op straat is tans ’n groot behoefte.
“Ons is almal gelyk. Moenie oordeel nie, staan eers in iemand anders se skoene. Kom ons maak ons harte oop en help mekaar.
Ons weet nooit wanneer ons self in nood gaan wees nie. Ons het die gemeenskap nodig – saam kan ons regtig ’n verskil maak.”
Enige persoon wat wil help, kan vir Anastasia kontak by 079 775 1717.
