Karliefhebbers het hul passie uitgeleef by Cowboy Town se jongste klassieke kar skou in West Village op 9 Augustus.

Mede-eienaar van die perseel, Mia Maré, het gesê hulle wou die gemeenskap bymekaar bring om pragtige ou motors te bewonder, stories en herinneringe te deel.

“Dit gaan nie net oor die motors nie, maar oor die mense wat dit saam kom geniet – ’n dag vol pret saam met familie en vriende,” sê Mia.

Sy het bygevoeg een van die motors was ‘n 1928 Ford Roadster, ook bekend as ‘n ‘hotrod’. Die eienaar van die kar, Luke Snyman, het vertel die motor het oorspronklik ‘n vier-silinder enjin ingehad, maar hy het dit vervang met ‘n vyf-liter Lexus V8.

“Ek het alles oorgedoen en die kar meer spoed-georiënteerd opgebou. Ek het ook die kar so oorgedoen dat dit gemaak is om baie en ver te ry.”

Mia vertel ook dat die skou op elke publieke vakansiedag gehou word. Die hoogtepunt vir haar was om al die blink motors bymekaar te sien, die eienaars se stories te hoor en die gesellige atmosfeer van musiek, kos en glimlagte te geniet.

Sy het afgesluit deur te sê hulle wil graag almal hartlik bedank – van die eienaars met hul motors en natuurlik al die besoekers.