Hoërskool Riebeeckrand se rugbytoekoms lyk blink en die skool spog graag vanjaar met al drie hul juniorrugbyspanne wat na die Goue Leeus-finaal deurgedring het.

Volgens skoolwoordvoerder Elzeri Wright is dit die eerste keer in die skool se geskiedenis dat drie spanne deurdring na die finaal.

Sy het vertel dat die juniorspanne op Saterdag, 4 Junie vir Hoërskool Bastion in tuiswedstryde geklop het. Die o.14’s en o.16’s het gevolglik direk deurgedring na die finaal, en die o.15’s na die semifinaal.

Die uitslae was soos volg:

• o.14: Riebeeckrand 5–0 Bastion
• o.15: Riebeeckrand 27–10 Bastion
• o.16: Riebeeckrand 33–7 Bastion

Op Saterdag, 11 Junie het Riebeeckrand se o.15’s weer teen Bastion gespeel, dié keer by Hoërskool Bastion, en die wedstryd met ‘n puik telling van 32–7 gewen en ook deurgedring na die finaal.

Ons rugbyseuns oefen hard, gee hul beste in elke wedstryd, en pluk nou die vrugte daarvan. Ons wens ons drie spanne alle sterkte toe met die finaal wat na die Junie-skoolvakansie gaan plaasvind,” het Elzeri vertel.

Die skool bedank ook graag hul eerste- en tweederugbyspanne wat vanjaar hul harte uitgespeel het, asook elke ondersteuner wat die skool se sportspanne kom ondersteun het.