Noord-Gauteng liga-sagtebalspanne kompeteer
Verskeie plaaslike skole het geveg om die titel as sagtebalkampioene in hul verskeie ouderdomsgroepe tydens die Noord-Gautengse liga.
Hoërskool Eldoraigne se eerste-sagtebal meisiespan en die meisies o.15 A-span het na afloop van die liga deurgedring na die semi-finale rondte van die Noord-Gauteng liga. Tydens die semifinale het die o.15’s gelykop 1-1 teen Pretoria-Noord gespeel, waarna hulle naelskraaps verloor het in die uitspeelrondte.
Intussen het die eerstespan tydens hul semifinale teen Hoërskool Centurion se B- span gewen. In die finaal het die eerstespan teen Hoërskool Centurion se A-span te staan gekom en na ’n verbete stryd van ’n uur en vyftien minute het Hoërskool Centurion die oorhand gekry en 6-4 gewen. Hoërskool Eldoraigne se eerstespan het dus tweede plek in Noord-Gauteng liga beklee. ’n Graad 9-leerling, Melissa Nel (links), is aangewys as die beste o.15 kolwer asook die beste kolwer in Noord-Gauteng. Die provinsiale spanne is ook aangekondig en Melissa en Karlu Lyons (regs) is vir die o.15 Noord-Gauteng se Blue Sox (A-span) gekies. Anneke Beukman (middel) is vir die o.17 Blue Sox van Noord-Gauteng gekies. Hierdie spelers gaan deelneem aan die einde van die jaar se provinsiale toernooie.
