Hy het al vragmotors gesleep en hy het al treine gesleep, maar Donderdagoggend in Centurion was die vraag op almal se lippe: Kan hierdie agtmalige Suid-Afrikaanse sterkman-kampioen werklik ’n C-160 Transall-vliegtuig sleep?
Die Suid-Afrikaanse Lugmagmuseum (SALM), in samewerking met XL, die wêreldbekende energiedrankie, het die Suid-Afrikaanse sterkman Etienne Smit, uitgedaag om ’n C-160-vliegtuig Donderdag by die Zwartkop-lugmagbasis in Centurion te sleep.
Die C-160 is nie sommer enige hierjy vliegtuig nie. Dis ook onder dienspligtiges uit die dae van die bosoorlog bekend as die ‘Flossie’. Hierdie staatmaker van ’n passasiersvliegtuig, wat 64 ten volle uitgeruste valskermsoldate of 94 gewone passasiers kan vervoer, het bekendheid gedurende die Bosoorlog in Angola verwerf. Nog nooit het ’n enkele persoon probeer om hierdie vliegtuig manalleen te sleep nie. Die vliegtuig is nie net reusagtig nie, dit het immers ’n vlerkspan van 42m, en ’n stert wat 12m van die grond op staan, maar uit ’n tegniese oogpunt gesien is dit ’n massiewe uitdaging.
“Hierdie vliegtuig het geweldige groot en breё bande, aangesien dit ontwerp was om doeltreffend te land en op te styg op en van ongeteerde vliegvelde,” het die SALM verteenwoordiger, lt kol Mike O’Conner verduidelik. “Etienne Smit sal moet uithaal en wys om hierdie ongelooflike uitdaging te bereik,” het hy gesê.
Almal wat die geleentheid bygewoon het, het in spanning gewag om te sien of Smit sou slaag. Hy het egter nie teleurgestel nie en met brute krag het Smit uiteindelik manalleen hierdie legendariese vliegtuig ’n volle 21m ver getrek.