Die slagoffer van ‘n gewelddadige huisroof is verheug dat die boosdoener 15-jaar tronkstraf opgelê is.
Cecilia van den Heever, ‘n Rietfontein-inwoner, het die Moot-polisie vir hul harde werk tydens die ondersoek bedank. “Ek is geweldig trots op hulle en dankbaar dat hulle my so mooi bygestaan het. Moot-polisie is staatmakers.”
Die 34-jarige Nicholas Masilela is op 26 November tot 15-jaar tronkstraf gevonnis nadat hy Van den Heever in Junie verlede jaar in haar woonstel oorval en beroof het.
Hy was uit op parool vir ‘n soortgelyke misdaad.
Masilela het Van den Heever oorval terwyl sy besig was om haar woonstel skoon te maak. Hy het haar na haar slaapkamer gedwing, vasgebind, ‘n kledingstuk oor haar kop getrek en ‘n mes teen haar keel gedruk.
Hy het haar deurentyd vir haar bankkaart se pin-kode gevra en die huis deursoek vir waardevolle besittings.
Van den Heever het ‘n ruk later gehoor dit word stil en vermoed Masilela is weg. Sy het haarself losgewikkel maar hom betrap terwyl hy by die kombuisvenster uitklim.
“Hy het haar gesien, haar teruggedwing na haar kamer en haar op die bed vasgebind. Hy het vrae oor haar voertuig gevra en is daarna uit by die deur,” sê Luitenant Linda Jerling, woordvoerder van die Moot-polisie.
Van den Heever het haarself losgewikkel, hulp by bure gaan vra en dadelik na die Jakaranda-sentrum gehaas om haar bankkaart te blok.
Tot haar verbasing het sy Masilela by een van die banke opgemerk waar hy probeer het om haar geld te trek. Sy het dadelik hulp ontbied en sekuriteitswagte en inkopiegangers het hom vasgetrek toe hy probeer vlug.
Na deeglike ondersoekwerk deur Adjudant-offisier Louis Hoffmann van Moot-polisie, het Masilela 15-jaar tronkstraf gekry.
Vir gratis gemeenskapsnuus, besoek Rekord se webwerwe:
Besoek ook ons Facebook en Twitter blaaie.
