Nog niemand is in hegtenis geneem oor die moord op ’n pa van vyf in Ninapark nie.
Sakkie Verster (56) is op 4 Januarie dood aangetref nadat rowers op sy huis naby die Heatherdale-begrafplaas toegeslaan het.
Volgens polisie was sy hande vasgebind en was hy op sy bed toe hy geskiet is.
Sy tienerdogter en haar vriendin, wat ook in die huis was tydens die rooftog, is vasgebind maar ongedeerd gelaat.
Verster se buurman Chris Zietsman (79) het vroeër vertel hoe die tienermeisies hulself bevry het nadat die rowers die huis geplunder en met hul buit gevlug het.
Zietsman het die tieners oor die muur tussen die twee erwe gehelp en die polisie gebel.
ALSO READ: Pta-noord man terug straat toe na aanval
Verster is verlede Vrydag deur sy familie begrawe.
Jo-Anne, een van sy vier dogters, beskryf Verster as ’n lieftallige familieman met ’n goeie sin vir humor.
“Ek kan nie verstaan hoekom dit gebeur het nie … hoekom hy moes doodgaan,” sê sy.
Jo-Anne sê haar jonger suster is nog erg getraumatiseerd na die moord op hul pa.
“Sy bly tans by haar ma.”
Sy sê: “Ons (familie) wag angstig op antwoorde; enigiets wat polisie kan help om my pa se moordenaars op te spoor.”
Polisiewoordvoerder kaptein Rebecca Phatlane sê ’n polisie-ondersoek duur voort.
Het jy dalk meer inligting rakende dié storie? Stuur gerus vir ons ‘n epos na editorial@rekord.co.za of skakel ons by 083 625 4114.
Vir jou daaglikse gratis gemeenskapsnuus, besoek Rekord se webwerwe:
Besoek ook ons Facebook, Twitter en Instagram blaaie.
