Vrouebeeld van ongesonge heldin by Voortrekkermonument onthul
'n Dapper heldin se beeld is aan die begin van Augustus in die Trekroetetuin van die Voortrekkermonument onthul.
Met Vrouemaand in gedagte, is ’n eerste-van-sy-soort-vrouebeeld ter nagedagtenis aan die Voortrekker-heldin Grietjie Prinsloo in die Voortrekkermonument se Trekroetetuin onthul.
Barry Müller, FAK-kultuurkoördineerder, sê dit is vir die organisasie belangrik om geskiedkundige helde paslik te vereer.
“Die Historiese Trekroetetuin by die Voortrekkermonument vertel die verhaal van soveel Afrikaner-helde op wie se skouers ons toekoms gebou is. Dus om ’n jong heldin vir die eerste keer in die geskiedenis te kan vereer, is ’n groot voorreg,” sê hy.
Die Grietjie Prinsloo-beeld is die derde oorspronklike beeld wat deur die FAK laat ontwerp is vir die monument.
Tydens die bloeddorstige aanval op ’n Voortrekkerlaer langs die Bloukransrivier in 1838, het die 16-jarige Prinsloo 26 assegaaisteke opgedoen en dit merkwaardig oorleef.
Die beeldhouer, Jaco van Niekerk, sê hy is baie bly om deel te kon hê aan die besonderse projek.
“Om ’n splinternuwe beeld te ontwerp wat een van ons onbesonge heldinne verteenwoordig, is ongelooflik,” sê hy.
Die beeld is deur Anneke Langner, ’n kommunikasiebeampte van die Voortrekkermonument en FAK, ontwerp.
Langner sê dit is vir haar belangrik om Prinsloo se storie op hierdie manier te kon vertel.
“Dit is ’n groot eer om deel te kan wees van so ’n projek. Op ’n klein manier ploeg jy terug in die gemeenskap wat jou gemaak het en plant ’n saadjie van hoop vir dié wat na jou kom,” sê sy.
LEES MEER: Vreugde oor Wonderboom-waterval weer loop
Het jy dalk meer inligting rakende dié storie?
Stuur gerus vir ons ‘n epos na editorial@rekord.co.za of skakel ons by 083-625-4114.
Vir jou daaglikse gratis gemeenskapsnuus, besoek Rekord se webwerf: Rekord
Besoek ook ons Facebook, Twitter en Instagram blaaie.
