Suksesvolle pretloop vir Sungardens Hospice
Plaaslike gemeenskap geniet pretloop terdeë.
“Jy staan nooit alleen in jou siekte nie.”
Só sê Pieter van Heerden, algemene bestuurder van die Sungardens Hospice versorgingsfasiliteit.
Die afgelope Saterdag was die omgewing van Wapadrand Security Village vol gees toe die Sungardens Hospice sy jaarlikse fondsinsamelingsgeleentheid aangebied het.
Inwoners het van heinde en van ver bymekaargekom vir ’n 5km-pretdraf, wat ’n gesamentlike stap simboliseer om diegene wat palliatiewe sorg benodig te ondersteun.
Die dag is afgeskop met ’n hartlike verwelkoming deur die Tshwane-burgemeester, Cilliers Brink.
“Sungardens Hospice doen baie waardevolle werk vir die gemeenskap en dis ’n wonderlike manier vir gewone mense om saam te staan en onderstreuning te wys. Dis ’n lekker sin van gemeenskap en bydra,” sê Brink.
Brink het spesifiek sy dank uitgespreek teenoor die mense wat in die palliatiewe veld werk. “Die harte van die mense wat die sorg gee is net wonderlik, en ons moet daardie mense ondersteun – van die susters tot die bestuurder en die trustees.”
Deelnemers het strikkies van verskeie kleure aan hulle klere vasgesteek om ondersteuning vir verskeie siektes te wys.
Hierdie strikkies het verskeie lewensbedreigende sowel as nie-lewensbedreigende siektes ingesluit.
Onder die mededingers was daar oomblikke van triomf en jubeling, aangesien die wenners uit beide die dames- en mansafdelings getree het.
In die damesafdeling het Jacky Coertzee Boxer die eerste plek behaal met ’n tyd van 19 minute en 6 sekondes. Ndazi Mabena het die tweede plek behaal, en kort op haar hakke was haar sussie, Nozipho.
Intussen het Stefan van Vuuren met ’n tyd van 19:27 in die mansafdeling die oorwinning behaal, met Darren Nash en Zander Zaayman wat onderskeidelik tweede en derde geëindig het.
Behalwe vir die opwindende wedloop, het die geleentheid ’n magdom aktiwiteite gebied om deelnemers te betrek.
’n Loterytrekking het ’n element van afwagting bygevoeg toe gelukkige wenners weggestap het met ’n verskeidenheid pryse.
Deelnemers en ondersteuners het hulself heerlik geniet aan verskeie kosstalletjies, koffie en musiek wat die lug gevul het met feestelikheid.
Van Heerden het sy dank uitgespreek teenoor almal wat bygedra het tot die sukses van die geleentheid. “Vandag is weereens ’n bewys van hoe die gemeenskap saam trek en saamstaan om een saak. Dit is waar ons almal se hande sterker word. Elke persoon wat vandag hier is dra by tot die groter doel.”
Van Heerden is ook dankbaar vir die fondse wat ingesamel is. “Die fondse wat vandag ingesamel is sal geweldig bydra tot die kostes verbonde aan verpleegsters en medikasie. Dit sal ook help met vervoerkostes om by die pasiënte uit te kom, aangesien ’n groot deel van ons sorg by mense se tuistes plaasvind,” sê hy.
“Die dokters, verpleegsters en maatskaplike werksters vorm ’n hegte span wat na elke pasiënt omsien, elk met hul unieke behoeftes. Ons ondersteun soos en waar ons kan.”
Vir meer inligting oor Sungardens Hospice en hoe jy hul saak kan ondersteun, besoek hul webwerf www.sungardens.co.za.
Het jy dalk meer inligting rakende dié storie? Stuur gerus vir ons ‘n epos na bennittb@rekord.co.za of skakel ons by 083-625-4114.
Vir jou daaglikse gratis gemeenskapsnuus, besoek Rekord se webwerf: Rekord
Besoek ook ons Facebook, Twitter en Instagram blaaie.
