Skoonheid is nie net iets wat jy sien nie, dit is iets wat jy voel.

Dis daardie selfvertroue wat jou help om die wêreld met gemak tegemoet te tree en geleenthede aan te gryp.

Dis juis waarop die maatskappy Hannons gebaseer is.

Hannons het in Oktober 2024 ontstaan uit die samesmelting van die ikoon en glam-guru Hannon Bothma se besigheid Hannon en Christine Steynberg se Sally Slimming.

Bothma sê deur ’n nuwe benadering tot die skoonheidsbedryf en ’n passie vir welwees, het die nege maande oue besigheid nie net nuwe momentum gekry nie, maar ’n ware verandering in die bedryf en hul produkreekse te weeg gebring.

“Ons ge-amalgameerde besigheid het reeds sy plek in die bedryf gevestig en is besig om grense te verskuif.

En hierdie veranderinge is nie net op die oppervlak nie. Dit is die begin van ’n era van vernuwing vir ons,” sê Bothma.

Sy uitgangspunt met die stigting van die oorspronklike maatskappy destyds het egter dieselfde gebly: Skoonheid, versorging en mooimaak moet maklik wees.

“Dit moet nie ’n ingewikkelde proses wees wat die lewe bemoeilik nie. Dit moet vinnig, prakties en bekostigbaar wees. Die idee was en is steeds om eenvoudige en doeltreffende produkte aan te bied wat nie net werk nie, maar ook mense help om selfvertroue te bou,” verduidelik hy.

“Wanneer jy soggens uit die huis stap, is dit nie net hoe jy lyk wat tel nie, maar hoe jy oor jouself voel,” sê Hannon.

“Wanneer jy goed versorg is, kan jy die wêreld tegemoet gaan op ’n wyse wat meer geleenthede na jou kant toe kan bring.

Selfvertroue is dikwels die sleutel tot sukses, en dit begin by die klein dingetjies wat jy in die oggend doen om jouself gereed te maak vir nog ’n dag.”

’n Meer gediversifiseerde rigting is ook ingeslaan deur die nuwe maatskappy. Die beskikbaarheid van produkte en produkreekse is beter as ooit.

Waar die produkte en produkreekse ook vroeër hoofsaaklik in haarsalonne en ’n beperkte aantal skoonheidsalonne te kry was, kan jy nou ook in apteke en ander kleinhandelswinkels vind.

“Hierdie uitbreiding beteken dat meer mense toegang het tot die produkte,” glo Bothma.

Die resultate spreek vanself.

Hannons het al twee keer toekennings gewen, een vir die Beste Gesigserum en die ander vir die Beste Gewigsverliesproduk.

“Vir ons is dit nie net ’n erkenning van die werk wat reeds gedoen is nie, maar ook ’n aanduiding van die pad vorentoe: ’n pad vol innovasie en ’n volgehoue verbintenis tot kwaliteit.”

Bothma sê met hul produkte is daar ’n etiese benadering.

“Deur die jare het die bewustheid onder verbruikers oor die skade wat sekere bestanddele kan aanrig, soos skadelike chemikalieë, vinnig toegeneem. Ons maak ’n bewuste poging om nuwe formules in sulke gevalle te ontwerp en te produseer, en bied ook wreedheidsvrye produkte aan en produseer produkte op so ’n wyse dat die omgewing beskerm word.”

Bothma se vennoot, Christine Steynberg, wat oorspronklik ’n veearts wou wees, het haar roeping in skoonheid gevind toe haar ma waargeneem het dat sy daarvan hou om haarself mooi te maak en goed te versorg.

Sy het voorgestel Christine volg ’n loopbaan in dié rigting.

Vandag werk sy saam met Bothma om ’n velversorgingsreeks aan kliënte te bied wat hulself in staat stel om die beste uit hul produkte te haal.

“Dit gaan nie net oor die produkte nie, maar oor die kennis wat jy deel, en hoe jy mense help om beter te verstaan hoe om die produkte te gebruik en versorging in hul daaglikse roetine te implementeer,” sê sy.

“Ek wil nie net produkte verkoop nie, ek wil mense leer hoe om hulself te versorg en die vreugde daarvan te ervaar,” sê sy.

Vir haar is die toekoms rosig.

“Ons is nie net besig om ons voetspoor in Suid-Afrika uit te brei nie, maar beplan ook om internasionaal meer mense te bereik met ’n Proudly SA-identiteit en ’n nuwe reeks vir mans. Ons glo dat die sukses van ’n maatskappy nie net meetbaar is in wins nie, maar tot watter mate jy mense help om beter oor hulself te voel.”

Het jy dalk meer inligting rakende dié storie? 

Stuur gerus vir ons ‘n epos na  bennittb@rekord.co.za of skakel ons by 083-625-4114.

Vir jou daaglikse gratis gemeenskapsnuus, besoek Rekord se webwerf: Rekord

Besoek ook ons Facebook, Twitter en Instagram en TikTok.