Lente is in die lug en in Pretoria skyn die sonnetjie deesdae al hoe warmer, wat beteken die winter is amptelik verby. In hierdie heerlike weer sal Pretoria se buitelugliefhebbers natuurlik weer stroom na plekke waar hulle die weer en vars lug kan geniet. Hengelaars wat met rolstoele oor die weg moet kom hoe ook nie agterweë te bly in hierdie lenteweer nie, want eerskomende Saterdag is dit weer tyd vir Ramcat se bekende hengelkompetisie vir gestremdes in rolstoele. Gerhard Smal, organiseerder van die kompetisie, sê vanjaar se kompetisie is beter en groter as ooit. Hy nooi alle rolstoel-hengelaars uit om deel te neem aan hierdie unieke geleentheid wat spesiaal vir hulle gereël word. Hengelaars sal weer ordentlik bederf word met die heerlike etes, terwyl hulp van vrywilligers beskikbaar is vir diegene wat nie hul eie helpers saambring nie. Daar sal ook genoeg pryse wees – nie net vir die manne wat die grootste vis vang nie, maar ook in ander kategorieë. Navrae: Gerhard Smal by 082-337-9064 of ystersmal@gmail.com