Die derde Gauteng Noord skole stoeiliga-byeenkoms is die afgelope naweek met groot sukses by dié stoeifederasie se basis in Menlopark aangebied.

Hierdie liga was die breinkind van Lourens Botha en sedert die eerste toernooi in 2012 groei dit jaarliks groter. By die eerste toernooi in 2012 het agt skole deelgeneem en vanjaar was elf skole vanoor die hele Pretoria deel van die toernooi, wat beteken dit het byna 200 stoeiers gelok.

Elke skool se span bestaan uit 12 stoeiers en vier reserwes. Elke span moes ook ’n aantal nuwelinge inskryf, wat volgens Botha uiteindelik goeie resultate oplewer ten opsigte van die groei van die sport in Pretoria, aangesien heelwat nuwelinge daarna by klubs aansluit.

Die wenner van vanjaar se toernooi was Laerskool Monumentpark. Hulle het Wierdapark in die finaal geklop. Laerskool Constantiapark was derde, nadat hulle teen Soshanguwe Schools aan die wenkant was.

Die Skild-kompetisie vir skole wat in eerste rondte verloor het, is deur die Tuisskole-span gewen. Dié span, wat bekendstaan as die Rowwe Ratels, is ’n georganiseerde stoeiklub vir tuisskool kinders.