Spelers van die Blou Bulle was onder die sterre in Saterdag se toetswedstryd op Ellispark in Johannesburg, waarin die Springbokke vir die eerste keer sedert 20 Augustus 2011 met die All Blacks kon afreken.

Victor Matfield was ’n staatmaker in die lynstane, terwyl die skakelpaar, Francois Hougaard en Handré Polard, verantwoordelik was vir aldrie die Bokke se drieë.

Agterlangs was die senter Jan Serfontein weer rotsvas op die verdediging, terwyl hy die Nieu-seelanders soms laat bontstaan het as hy die bal in die hande gekry het.

Die Springbokke het die All Blacks in die eerste helfte totaal oorheers en al drie hul drieë is in dié 40 minute gedruk.

Soos wat ’n mens van die wêreld se nommer-een span en die huidige wêreldkampioen kan verwag, het die All Blacks egter in die tweede helfte teruggekom met twee vinnige drieë en tien minute voor die eindfluitjie het hulle nog voorgeloop. ’n Strafdoel van 55 meter deur reserwe losskakel, Pat Lambie, het dit egter vir die Bokke moontlik gemaak om uiteindelik die wedstryd met 27-25 te wen.

Dit was die eerste keer in ses pogings wat die Bokke met hul grootste vyand kon afreken onder die afrigting van Heyneke Meyer. Kenners meen egter dat die Bokke waarskynlik nou ’n sielkundige voordeel kan hê wanneer die wêreldbeker toernooi volgende jaar aanbreek. Meyer se span verbeter steeds teen ’n opwaartse kurwe en oor ’n jaar van nou af, wanneer die wêreldbeker toernooi in Engeland plaasvind, sal hierdie Springbokspan waarskynlik spook by die All Blacks en hul ondersteuners.