Die Blou Bulle het Vrydagaand op Loftus Versfeld ses puik drieë gedruk om die Pumas van Nelspruit oortuigend met 39-29 te klop in hul Curriebeker wedstryd op Loftus Versfeld.

Nadat Pote Human se span vroeër in die reeks veral met hul hantering en balretensie gesukkel het, kon hul ondersteuners moed skep uit hierdie vertoning. Daar was duidelike verbetering in verskeie fasette en teen hierdie tempo sal die Pretorianers waarskynlik weer ernstige kandidate wees om vanjaar hul bekerdroogte te verbreek.

Die wedstryd is teen ‘n baie hoë tempo gespeel, wat die Blou Bulle se vertoning veelseggend maak.

Jimmy Stonehouse se Pumas het beslis ook nie Pretoria toe gereis om dinge vir die tuisspan maklike te maak nie. Tipies van spanne wat deur Stonehouse afgerig word het Hugo Kloppers en sy spanmaats nooit gaan lê nie. Dit het beteken dat die Blou Bulle moes veg tot die einde om die oorwinning te beklink.

Hoewel die Bulle se spel in die lynstane effens gelol het, was hul dryfspel puik.

Dit was egter die tuisspan se ondernemende spel en die wyse waarop hulle die bal lewend kon hou wat ‘n verskil gemaak het en dis juis hierdie verbetering op vertonings vroeër in die reeks wat ondersteuners én die span self sal laat uitsien na die pylvak-fase van die toernooi.

PUNTEMAKERS:

BLOU BULLE: 39 Drieë: Hanru Liebenberg, Jade Stighling (2), Dayaan van der Westhuizen, Ivan van Zyl, Jano Venter. Doelskoppe:  Manie Libbok (3).

PUMAS: 29 Drieë: Marnus Schoeman, Marko Janse van Rensburg, Neil Maritz, Morné Joubert. Doelskoppe: Chris Smith (3). Strafdoele: Chris Smith  (1)

Skeidsregter: Rasta Rasivenge

https://www.facebook.com/BullsOfficial/videos/1045899755590935/

Vir jou daaglikse gratis gemeenskapsnuus, besoek Rekord se webwerwe: