Bulls maak skande teen aggressiewe Jaguares op Loftus
Vier nederlae in ’n ry, waarvan twee agtereenvolgens op Loftus Versfeld, terwyl hulle net een ligapunt op die puntelys het om vir hul moeite te wys – dit is die Bulls se situasie ná die loesing wat hulle Saterdagaand op Loftus Versfeld by die Jaguares van Argentinië gekry het.
Jerónimo de la Fuente en sy Jaguares-span uit Argentinië het Saterdagmiddag op Loftus Versfeld bevestig dat Pote Human se Bulls baie diep in die moeilikheid is toe hulle die Bulls met 39-24 pakslae gegee het.
Daar lê nog 12 ligabepalings, waarvan vyf oorsee gespeel moet word, vir Human se span voor in die 2020 SuperRugby toernooi en die rooi ligte flikker oral oor Loftus Versfeld vir dié span.
Die Bulls het Saterdagaand in elke aspek behalwe die vaste skrums pak gekry teen die Suid-Amerikaners en dié gesukkel het uitgeloop op ses drieë vir die besoekers teen die drie van die tuisspan.
Afronding was weer die Bulls se groot probleem. Hulle het, veral in die eerste helfte, menige geleenthede vir hulself geskep, maar kon telkens nie afrond nie. Daarbenewens was swak verdediging ook een van die hoof oorsake van hul ondergang.
Teenoor die Bulls se swak verdediging het hul teenstanders gewys hoe dit gedoen behoort te word. Hulle het die Bulls gereeld terugeduik en sodoende van momentum beroof.
Op die aanval was die Bulls weer teleurstellend eendemensioneel. Die gebrek aan kreatiwiteit word ’n krisis en een van die groot redes waarom dié span eenvoudig nooit lyk of hulle hul teenstanders kan klop, ten spyte van genoeg geleenthede nie.
Ja, dis nog vroeg in die seisoen, maar daar moet beslis alarm gemaak word. Bulls rugby is in ’n krisis. Dis te betwyfel of daar genoeg beter spelers op die Bulls se boeke is om hierdie skip om te draai. En na dese raak dit al hoe moeiliker om te glo dat die bestuurspan ook oor die vermoë beskik om die span se lot te verander.
PUNTEMAKERS:
BULLS: 24 Drieë: Marco van Staden, Warrick Gelant, Cornal Hendricks, Doelskoppe: Morné Steyn (3). Strafdoele: Morné Steyn (1)
JAGUARES: 39 Drieë: Emiliano Boffelli (2), Rodrigo Bruni, Guido Petti, Matias Moroni, Santiago Socino. Doelskoppe: Joaquin Bonilla (3) Strafdoele: Joaquin Bonilla (1)
Skeidsregter: Ben O’Keefe
https://www.facebook.com/BullsOfficial/videos/3157733014237741/
Het jy dalk meer inligting rakende dié storie? Stuur gerus vir ons ‘n epos na editorial@rekord.co.za of skakel ons by 083-625-4114.
Vir jou daaglikse gratis gemeenskapsnuus, besoek Rekord se webwerwe:
Besoek ook ons Facebook, Twitter en Instagram blaaie.
