Vir die gewone rugby-ondersteuner voel dit waarskynlik of die huidige rugbyseisoen een groot chaotiese gemors is.

Wedstryde word links en regs gekanselleer, spelers toets positief vir Covid al is hulle in sogenaamde “bio borrels” en om alles te kroon kry mens tans die gevoel dat die huidige toer van die Britse en Ierse Leeus inderdaad reeds in vele opsigte ’n klaaglike mislukkig is – die grootste anti-klimaks wat Suid-Afrikaanse sport in dekades beleef het.

Dis ’n feit dat hierdie Covid-krisis Suid-Afrikaanse sport oor die algemeen op ’n baie slegte tydstip in ons geskiedenis getref het. Suid-Afrikaners sien op TV hoe kuier die Britte op stamvol paviljoene by Wimbledon en by die Britse Ope gholftoernooi. Hulle sien ook hoedat daar reeds groot hoeveelhede toeskouers toegelaat is by die eindstryde van rugbyreekse in Europa, soos die Engelse Premierliga, die Franse Top-14 liga en die Europese Beker-reeks. Dan word daar baie vrae gevra oor die wyse waarop die krisis hier hanteer is en die skade – finansieel en sosiaal – wat dit aan die sport-industrie berokken het.

Die erns van hierdie situasie in Suid-Afrika is vergroot vanweë die feit dat dit gebeur het teen ’n agtergrond van groeiende apatie onder Suid-Afrikaanse sportliefhebbers weens redes wat absoluut niks met die Covid-krisis te doen het nie.

As hierdie Covid-hoofstuk die dag afgesluit word sal die mense in bestuur van groot sportsoorte soos rugby en krieket op alle vlakke fyn moet trap om eerstens die bloeding te stop en tweedens die geloofwaardigheid en bemarkbaarheid van die sportsoorte weer te herstel. Dit is tyd dat daar weer gekonsentreer word op dit wat regtig saakmaak – die prestasie van sportspanne in ’n geloofwaardige milieu.

Teen hierdie agtergrond is daar goeie nuus vir die sogenaamde Bloubul familie. Die afgelope naweek se 17-14 oorwinning van ’n jong Bulls span oor die Suid-Afrikaanse “A”-span het baie groter betekenis as net spogregte vir Bulls ondersteuners.

Hierdie oorwinning én die wyse waarop die Ligbloues gespeel het om dit te kan doen, het daarop gedui dat die Bulls die een unie in Suid-Afrika is wat die opbou van ’n behoorlike groep-sisteem met genoegsame diepte in alle posisies verstaan en pro-aktief daaraan werk.

As daar nog enige twyfel is dat die Bulls bestuur die regte skuif gemaak het toe Jake White sowat 15 maande gelede as nuwe Direkteur van Rugby aangestel is, het Saterdag se wedstryd teen ’n span vol internasionale sterre waarskynlik die twyfel laat verdwyn.

Natuurlik het White ook ’n paar foute gemaak oor die afgelope 15 maande. Maar as die situasie op die keper beskou word en vergelyk word met waar die Bulls teen Maart 2020 was voor die Covid-krisis toegeslaan het, kan enigiemand met die vermoë om perspektief te behou die verskil sien.

Die moontlikheid op sukses in die toekoms vir Suid-Afrika se provinsiale franchises sal gebou word op drie pilare.

Eerstens, wat die vertonings op die veld betref,  sal daar diepte in die groep moet wees met ’n behoorlike balans tussen ervare sterre en talentvolle jongelinge.

Tweedens sal daar ’n bestuurspan rondom hierdie groep moet wees wat hulle behoorlik kan toerus as spelers, die span gedurig moet kan versterk met die regte visie vir die toekoms en natuurlik ook die vermoë moet toon om die groep en hul leieirskorps só te bou en bestuur dat daar kohesie sal wees. ’n Gelukkige span is ’n wenspan.

Derdens sal die Bulls se bemarkbare beeld na buite gebou moet word met die fokus op die regte plekke. Die huidige bestuur van die Blou Bulle rugby-unie doen hiermee uitstekend. Die belangrikste punt wat hier in gedagte gehou moet word is dat ons leef in ’n baie klein wêreld weens faktore soos sosiale media. Ons leef in ’n land waar mense maklik apaties raak as hul intelligensie onderskat word of hul lojaliteit uitgedaag word met uitgediende retoriek en kantlyn-politiek.

Kyk maar gerus na krieket in Suid-Afrika as voorbeeld van hoe dit nié gedoen word nie.

Die Bulls het die afgelope 15 maande baie dinge reg gedoen om weer die toonaangewende rugby-naam in Suid-Afrika te wees. Die regte manne is duidelik nou in beheer om die gevreesde Blou Bul van ouds te laat herrys. Solank die fokus by rugby tussen die vier lyne op die veld bly – op alle vlakke, van Bulletjierugby tot by die spogspan van Loftus.

Het jy dalk meer inligting rakende dié storie? Stuur gerus vir ons ‘n epos na editorial@rekord.co.za of skakel ons by 083-625-4114.

Vir jou daaglikse gratis gemeenskapsnuus, besoek Rekord se webwerf: Rekord

Besoek ook ons Facebook, Twitter en Instagram blaaie.