Anet du Toit en Jay Anece leef hul kunstalente uit

BETHAL – Ma en dogter, me. Anet du Toit en me. Jay Anece Janse van Rensburg, het beide hul kunstalente ontgin en leef hulself uit in hul kuns.

Me. Du Toit is bekend in kunskringe en haar skilderye van diere en mense verkoop soos soetkoek.

Sy het haarself geleer skilder en in 2008 daarop begin fokus om op skilderdoeke eerder as op leer te skilder.

Vir jare het sy ‘n onderneming op Bethal gehad wat leerwerk gedoen het en ‘n vriendin het een keer vir haar gesê:

“As jy so kan skilder op leer, dink net wat jy op ‘n skilderdoek met olieverf sal kan doen.”

Sy het 3D-werk op die leer gekerf en geverf.

Me. du Toit het besluit om haar gereedskap vir leerwerk te verkoop en skilder die afgelope vyf jaar voltyds.

Haar werk is meestal op bestellings en sy geniet dit as sy vir ontspanning kan skilder wat sy wil.

Wildlewe-skilderye en portrette te skilder is haar gunsteling en sy geniet dit die meeste.

Me. Janse van Rensburg volg in haar ma se voetspore en het by haar ma geleer skilder en ook kuns op skool as vak gehad.

Sy het ná skool ‘n skryfkursus asook grafiese ontwerp gedoen.

Verlede jaar het sy begin om kunsklasse aan te bied vir hoofsaaklik laerskoolkinders, maar sy het gesê enige iemand vanaf vier tot 100 jaar is welkom.

Me. Janse van Rensburg is voltyds aan die gang met grafiese ontwerpe vir ondernemings en het ook al die illustrasies vir ‘n kookboek, Cooking for a Camp Hostel or Large Group vanuit Chris Eksteen se pen, gedoen.

Sy doen ook ontwerpe vir koffiebekers wat sy verkoop en sy gebruik graag haar ma se skilderye vir die bekers.

Anders as haar ma, wat olieverf verkies, verf me. Janse van Rensburg graag met waterverf en teken met potlode en doen graag beeldende kunste.

Sy geniet dit ook om digitale kuns op die rekenaar te doen en ontwerp ook illustrasies vir mense wat borduurwerk doen.

“Ek doen nie so baie tradisionele kuns nie, want my hart is te seer om die skildery te laat gaan,” het sy gesê.

Me. du Toit het afgesluit dat sy soms vir haar kliente sê sy wil eers die kunswerk vir so week hou en bietjie geniet voordat hulle dit kan kom haal.

Dié ma en dogter kunstenaars het ‘n hegte band en bestee graag tyd saam as ‘n gesin.