Luné Snyman leef haar droom om renmotors te ry

SECUNDA – Vir Luné Snyman (27) kom dit natuurlik om in motorenjins rond te krap en selfs agter die stuur van ‘n renmotor in te skuif.

Sy was van kleins af ‘n “tomboy” wat pouses eerder rugby en krieket saam met die seuns gespeel het as om saam met die meisies te sit.

“Ek het permanent ‘n kort broek onder my rok gedra,” het Snyman gesê.

Sy en haar pa, Edward Strydom, het sedert 2016 saamgery toe Snyman aan motorsport begin deelneem het.

Sy is een van net ‘n handjievol vroue in Suid-Afrika wat aan tydrenne deelneem.

Daar is gewoonlik nie ‘n afdeling vir vroue by tydrenne nie en dus moet Snyman teen mans meeding.

Sy was die bestuurder en haar pa haar die navigator.

Dié span het in motorkringe as span “Lunetic” bekendgestaan.

Snyman het van kleins ‘n passie en belangstelling in motorsport gehad.

Sy en haar pa het altyd saam na die Sasol tydren in Sabie en Nelspruit gaan kyk.

“Ek het altyd foto’s geneem en gedink dit sal wonderlik wees om self so ‘n renmotor te kan bestuur,” het Snyman gesê.

Sy het dié idee aan haar pa genoem en hulle het begin planne maak om ‘n tydrenmotor te koop.

Sy het tot onlangs ‘n Toyota Tazz 1600 gery, wat hulle self opgebou en gerestoureer het.

Een van die ander tydrenkampioene, Rory Eland, het Snyman se talent raakgesien en aangebied om een van sy tydrenmotors aan haar beskikbaar te stel.

Eland het gesê hy kan Snyman se rou talent raaksien en wil haar help om dit te ontgin.

“Hy het gesê met die Subaru sal ek baie van my mylpale kan behaal en ook vinniger my talente kan bevorder.”

Snyman soek tans na borge sodat sy einde Maart in die Wes-Kaap haar eerste tydren in haar nuwe renmotor, ‘n geel Subaru Impreza WRX Sti, kan deelneem.

Sy is nou deel van die “Dialogic”-span en haar nuwe navigator is Rikus Fourie van Port Elizabeth.

“Die tydren-gemeenskap is soos ‘n familie en ek en Rikus is goeie vriende.

“Mens moet saam met iemand in die renmotor klim met wie jy gemaklik voel en ook ten volle kan vertrou as die tweede bestuurder van die motor.”

Snyman en Eland, wat nog ‘n Subaru het waarmee hy self ry, sal ook teen mekaar meeding.

Eland het verlede jaar die ope klas-kampioenafdeling van die tydren gewen, en Snyman het dié kampioenskap in 2017 met haar Tazz gewen.

Eland het gehelp om ‘n oefensessie vir Snyman en haar nuwe spanmaat in hul nuwe Subaru te reël.

Die tydrenjaer, Leon Botha, het die twee vroeër vanjaar in Limpopo vir ‘n opleidingssessie geneem en wenke gegee.

‘n Paar aanpassings moes vir Snyman aan die Subaru aangebring word.

Eland het Snyman ook verlede jaar tydens ‘n tydren op Ermelo uit die knyp gehelp sodat sy die tydren kon voltooi.

“Hy het gesien span “Lunetic” gee nie moed op nie.

“As dit nie vir hom was nie, sou ek nie aan daardie tydren kon deelneem nie.”

Snyman het op Bethal grootgeword en sy werk tans op Secunda as aptekerassistent by The Local Choice Medico apteek.

Sy is twee jaar gelede met mnr. Gerhard Snyman getroud. Hy ondersteun haar stokperdjie as tydrenjaer.

Hulle woon op ‘n plaas tussen Trichardt en Bethal en boerdery is ook een van Snyman se passies.

Haar man is tans ‘n saaiboer in sy vrye tyd, maar sy sal graag eendag met beeste, skape en varke wil boer.

“Tydren is nie net vir my ‘n passie nie, maar ‘n lewensreis met soveel lesse en onvergeetlike herinneringe,” het Snyman gesê.

“Dit is beslis iets wat altyd in my are sal vloei. My hart klop motorsport.

“Daar is niks wat naby daardie gevoel van adrenalien kom wanneer jy uit die renmotor klim en jou hande bewe so liggies nie.”

In haar vrye tyd draf sy graag of ry fiets.

Sy het al haar borge bedank en gesê sy sou nooit haar droom kon uitleef as dit nie vir haar borge was nie. Snyman se droom is om eendag aan die Dakar-tydren deel te neem, maar vir dié droom benodig Snyman ‘n hele produksiespan, asook ‘n groot borg.

Snyman skenk 10 persent van al haar borge aan liefdadigheid en het al voorheen geld aan die Burre Burger droogtehulpfonds en Hoëveldrif DBV geskenk.

Sy wil ‘n deel van haar volgende borggeld aan me. Isabel Watson oor wie die Ridge Times verlede week berig het, skenk.

Me. Watson moet ‘n dreineeringspyp in haar brein kry en het nie ‘n mediese fonds nie.

As jy Snyman wil borg of ondersteun, skakel haar by 073 428 1983 of besoek haar Facebook-blad: Teamlunetic.