Ondersteun die Boks vir ’n Boer-projek vir boere wat deur brande in Vrystaat geraak is
Die Pak ’n Boks vir ’n boer-projek is daarop gefokus om hulp te verleen aan die talle boere wat hul besittings in dié brande verloor het.
AfriForum het ’n projek geloods om die boeregemeenskap van die Wes-Vrystaat (Hertzogville, Boshof, Hoopstad, Dealesville en Bultfontein) te ondersteun ná vandeesweek se verwoestende brande.
Honderde beeste, skape en wild het doodgebrand of moes van kant gemaak word en sowat 130 000ha weiding het in die slag gebly.
Die Pak ’n Boks vir ’n Boer-projek is daarop gefokus om hulp te verleen aan die talle boere wat hul besittings in dié brande verloor het. Wonderwerkies kleuterskool is ’n versamelpunt vir die bokse.
Bokse moet op Maandag, 26 Oktober ingehandig word wat dan op 27 Oktober na AfriForum se hoofkantoor in Centurion afgelewer sal word.
Die lysie van benodighede vir ’n boks is:
• Toiletware
• Blikkieskos
• Beskuit
• Koekies
• Koffie
• Suiker
• Tee
• Langlewemelk
• Oor-die-toonbank-medisyne
Me. René van Rooyen, eienaar van Wonderwerkies kleuterskool het vertel dat inwoners wat net los items wil skenk is welkom, wat hulle dan in onvolledige bokse sal pak.
Inwoners wat ’n bydrae wil maak, word daaraan herinner dat die bokse op 26 Oktober ingehandig moet word.
